不可能任務｜港姐六女將體驗警隊任務 防爆談判搜索樣樣試勻

《不可能任務》第二季，繼早前一班藝員同事挑戰擔任幕後工作之後，今個星期日就會播出全數由港姐出身嘅靚女，包括 蔡思貝 謝嘉怡 邵珮詩 蘇韻姿 黃碧蓮 同 邢慧敏 所參與嘅「警隊跨部門演習」挑戰。

今次Sisley被委任擔任隊長，而向來崇尚自然嘅Lisa就全程素顏上陣，大晒健康天然美。 「六人港姐兵團」，將接受由「警察搜查隊(FSU)」、「警察談判組(PNC)」、「警察高空工作隊(FRAC)」同「後備爆炸品處理小組(EOD Cadre)」 安排嘅專業訓練，透過實習同實戰經驗、體驗警隊四個兼任職務。

佢哋接受完為期三個星期嘅特訓之後，最終6位成員會攜手上演聯合小型演習作為「畢業任務」。已經公開嘅宣傳片當中，幾位港姐除咗專業造型英姿颯颯之外，又挑戰超高空工作， 感覺刺激緊張。

星期日播出嘅第一集雖然只係熱身，但已相當精彩，蘇韻姿等人喺毫無心理準備情況下，就要立即進入緊急狀態，參與唔同程度同類別嘅特殊任務，好似談判同搜查重要證物等。呢集亮點仲包括思貝等人親身體驗「爆炸品處理課」嘅防護工具—有成80磅重嘅防爆衣。而體重只得約100磅嘅Sisley，著上防爆衣後舉步維艱，踎低起身仲需要隊友出手攙扶，相當遴迍。

談到防爆衣嘅著後感，思貝就笑言好似變咗孫悟空一樣：「其實件衫一擺上膊頭已經感受到個重量，係好有安全感。我覺得自己好似孫悟空畀五指山責住咁，真係好重。 因為件衫有成80磅，我自己重百零磅左右，真係好似畀成個人全身責住晒咁。」 

而為咗做好隊長職責、塑造應有威嚴感，思貝亦刻意收起笑容指揮隊員，不過可惜好快就「打回原形」，同大家有說有笑，拍攝期間又不時喺鏡頭前做出佻皮動作。

《不可能任務》星期日晚 22:00 翡翠台