一舞傾城丨唐文龍陳法蓉拍親熱戲有壓力蔡潔被小強襲擊處變不驚

唐文龍同陳法蓉喺劇中飾演夫妻。

喺劇集《一舞傾城》入面同唐文龍飾演夫妻嘅陳法蓉，表示除咗楊明同文凱玲外，同呢套劇嘅所有演員都係第一次合作，講到同唐文龍嘅合作，佢話同對方合作得好愉快，仲爆對方有句口頭禪：「佢係一個好特別嘅演員，好多嘢佢都有自己嘅諗法，大家有商有量，同埋佢有句口頭禪，就係『傳說中嘅陳法蓉』，佢話佢好多朋友都好喜歡我，好羨慕佢可以同我合作演夫妻！」
唐文龍話同陳法蓉演親熱戲有壓力。
陳法蓉續指呢套劇賣點係唔同嘅「情」，除咗佢同一班姊妹嘅情外，佢同唐文龍嘅一段情都好重要，陳法蓉話：「劇中佢坐咗廿幾年監，後生時冇得同佢好 Enjoy 咁拍拖，到依家咁上下年紀，佢終於放監出嚟重聚，終於唔使隔住玻璃咁探監，嗰種重逢嘅感覺係好特別。我都有同文龍講，只要將呢種情呈到出嚟，觀眾就會好鍾意。」
劇中兩人好sweet。
至於唐文龍則大讚「老婆」陳蓉姐係女神，仲同大家分享第一日見面時嘅情景：「當時我喺化妝間化緊妝，佢喺後面經過時好 Cute咁話『老公點呀？我哋第一次合作喎。』佢好Nice 咁主動破咗冰先，令到我哋更容易互動去演啲甜蜜戲份。」劇入面同陳法蓉有唔少親熱戲，但文龍笑言係個甜蜜嘅壓力，因為對方始終係女神，不過好在拍攝時大家都好合拍，加上對方好快投入角色，所以大家都好放心去發揮。
唐文龍話唔少朋友視陳法蓉為女神。
另外TVB官方釋出《一舞傾城》NG花絮片，其中一幕陳星妤嘅戲服勾住咗姚子羚嘅衫，瞬間變成了連體嬰嘅佢哋忍唔住爆笑，同場嘅楊明則為二人解圍。
NG片花絮。被小強襲擊嘅蔡潔處變不驚。
另一場蔡潔同陳法蓉喺露台拍攝傾偈場口時，突然有隻「飛天小強」突襲，仲要停咗喺蔡潔件衫上樣，當時陳法蓉已經嚇到尖叫，但「受害者」蔡潔則處變不驚，用手輕輕一彈，就彈走咗小強，令大家讚嘆不已。

《一舞傾城》逢星期一至五 21:30 翡翠台