東張+

TVB全新綜藝節目《歐洲鐵騎遊》由今晚（9號）起、逢周六晚8點半翡翠台播映。節目由兩位電單車愛好者袁偉豪（Ben）、張振朗（Owen）擔任主持，孖工作團隊挑戰10日內親駕鐵騎遊走歐洲四個國家，由法國出發，途經意大利、奧地利，最後去到德國，參加由百年著名汽車生產商舉辦嘅電單車節。

袁偉豪同張振朗 chok 到去歐洲。

為咗畀觀眾睇節目感受到第一身鐵駕遊樂趣，製作組採用多角度拍攝手法進行記錄；由於隨團人數有限，連2名藝人全程只有4人參與拍攝，攝影器材則有2部航拍機、2部相機、1部DV、4 部全景相機360及4部GoPro；為咗幫輕導演及攝影師，袁偉豪同張振朗出發前自薦幫忙拍攝及自拍，而攝影師主力負責從後跟拍，務求帶出100%真實感！頭尾共10日嘅歐洲鐵騎遊，連預備、起飛及回程前後須13日左右，佢哋除咗喺行程第5日有1日休息時間，其餘日子都係日騎至少10粒鐘，難怪袁偉豪喺酒店房自拍，展現極疲倦狀態！

振朗大讚袁偉豪好玩得。

兩位小生惺惺相惜。節目由兩位電單車愛好者袁偉豪（Ben）、張振朗（Owen）擔任主持。

是次全長約2,700公里嘅拍攝，人手緊絀、行程緊密，過程更係諸多阻滯兼驚險重重，連番遇上滂沱大雨、更出現炒車事件，袁偉豪同張振朗出發前一晚明顯表現得十分不安及忐忑。第一日，佢哋由法國小鎮旺斯出發去意大利貝內韋洛，惟二人出發不久便跟甩大隊，其間佢哋焦急多次爆粗；事後袁偉豪同張振朗笑言冇諗過講咁多粗口，袁偉豪憶述當時苦況：「真係好多分岔路、好多迴旋處、好多大貨車。」眾人擾攘咗3粒鐘先走出困局。至於第二日，鐵騎團由貝內韋洛出發去塞拉瓦萊斯克里維亞，由於遇上天雨路滑，張振朗喺其中一個彎位跣胎炒車，袁偉豪見狀馬上衝上前將佢扶起！而要振朗炒車後，第一時間最擔心竟然畀阿媽知道，十分搞鬼。

就算係張振朗炒車一刻，都有唔同角度嘅直擊，因為佢哋每日嘅行程，都一直動用住好多鏡頭進行拍攝。振朗炒到風衣都爛埋，佢最驚原來係畀媽咪知。振朗嘅炒車意外，係發生喺第二日。

袁偉豪同張振朗喺節目嘅Mens’ Talk均冇劇本，任由二人自由發揮「爆料大放送」，先係袁偉豪自爆太太張寶兒媽咪唔鍾意佢揸電單車，張振朗開名大爆坐過佢電單車嘅三名圈中「張女郎」。對於女性坐電單車尾，袁偉豪認為坐得電單車尾嘅女仔，關係都係非比尋常，當張振朗追問「袁女郎」名單，袁偉豪卻攞外母作擋箭牌，原來袁偉豪同張振朗喺訓練班時期已結緣，身為前輩嘅袁偉豪更搞笑「投訴」：「你訓練班啱啱出嚟嗰時仲叫我Ben哥，你依家冇喇！」袁偉豪坦言與張振朗首度合作惺惺相惜：「好啱傾好啱玩，我哋有樣嘢好似，都係一步一步捱出嚟。」

佢哋仲有飲吓紅酒、傾吓男人經。