你好，我的大夫丨關嘉敏挑戰病患角色 練習痙攣病發嚇親家人

每次客串劇集演出都令人眼前一亮嘅關嘉敏Carman，今次喺《你好，我的大夫》入面再改形象，飾演一個患有神經性肌肉痙攣嘅三項鐵人運動員。喺20號晚播出嘅一集，就講到Carmen因為病患而經常不受控制地痙攣，令身為運動員嘅佢萬念俱灰打算輕生。
關嘉敏飾演患有神經性肌肉痙攣嘅三項鐵人運動員。
Carman 接受訪時笑言拍呢場喊戲其實好忙，既要兼顧絕望、藐視及無助呢啲複雜嘅情緒表達外，又要兼顧「高度」，Carman笑言自己都好緊張自己呢場戲嘅表現：「播之前我都有追問監製，佢都話睇到有少少想喊，咁我就放心少少，但依然會好緊張。嗰場喊戲又要發脾氣、又要跳樓，其實場跳樓戲我係 有啲期待，因為吊到好高，我份人好鍾意刺激嘢，但上到去其實我係腳震。對我 嚟講，痙攣、跳樓都係我第一次，我覺得好開心，因為學咗好多嘢。」
因為患病而起輕生念頭。
而喺21號播出嘅一集，穿住病人服嘅關嘉敏喺醫院後樓梯病發，成個人僵直地倒地，手腳都呈現唔自然嘅彎曲，雙眼都不斷向上反。 Carman事後透露自己為拍呢場戲，曾經上網搜尋資料：「上網完全搵唔到任何片，因為發生痙攣時旁觀嘅人係會去幫手而唔係拍片，所以就改為 search 好多痙攣嘅徵狀，再加自己嘅幻想打造番個角色出嚟，例如會有啲咩抽搐動作，腳趾、 手部同頭部嘅郁動又會係點。」

為咗呢個角色Carman做咗唔少功課。
為咗盡早投入角色，Carman開拍前喺屋企獨自於睡床「震」足一個月，仲因為咁而嚇親家人：「我每晚臨瞓前都喺張床度係咁震。好記得有一次，我屋企人突然 入咗我間房，見到我喺度震嚇親，猛問的有冇事。」Carman話就係因為咁，自己同屋企人都好期待出嚟嘅成果呀！

《你好，我的大夫》逢星期一至五 20:30 翡翠台