黃宗澤認愛煮住家飯 陳家樂難忘同華仔合唱

黃宗澤、陳家樂同黃德斌等人為有份參演既新戲宣傳，電影講述江湖人士為爭上位既故事，劇情就梗係唔少得打鬥場面啦，雖然部電影係兩年前開鏡，但係大家講番啲動作戲既時候，都仲係歷歷在目。

Bosco話第一日開工就喺沙灘邊打起嚟，家樂話原先無講過話要落水打，點知導演同武指就嗌佢哋越打越出，最後打到海中心，仲要被水中既蠔殼整傷腳。而另一場喺尖東街頭打鬥既戲份，仲被市民誤以為有人真打鬥而報警。佢哋又話拍攝要求認真，其中一幕家樂被掌摑既場面，就因為要拍到最佳效果，家樂被武指摑到塊臉又紅又腫。

Bosco日前喺網上分享入廚樂，被網民指令豪宅曝光，Bosco就澄清話早前到內地拍劇，當地有個好靚既廚房，而一向鍾意入廚既佢就不時親自下廚煮嘢食煲湯兼拍片同大家分享。對於被指坐擁十間物業兼八架名車，Bosco就尷尬笑住話無、無、無，唔好提呢啲，佢話自己鍾意請人去自己屋企食住家飯，當中包括三哥苗僑偉。

日前家樂獲邀出席偶像劉德華既生日會，家樂話去到現場先知係以演唱會方式舉行，仲有幸坐到第一排，最驚喜係華仔嗌佢一齊上台唱歌，令佢落台下刻都有啲感動眼濕濕，因為佢當年入行其中一個願望就係想同華仔合作，希望之後有更多機會。