你好，我的大夫丨與陳嘉慧母女情感動觀眾 蘇恩磁笑言盼再演野蠻奶奶

以中醫為題材嘅劇集《你好，我的大夫》，21號晚播出嘅一集，除咗繼續有關嘉敏飾演嘅神經性肌肉痙攣個案外，仲有陳嘉慧同蘇恩磁嘅母女情。

劇中蘇恩磁飾演嘅羅培清，為咗賺多個錢幫囡囡袁絲絲(陳嘉慧 Erica 飾)交學費，所以唔理幾辛苦，都咬緊牙關額外接多份夜間洗碗工作，培清見到眼泛淚光嘅絲絲趕嚟，仲扮平淡咁話：「夜晚喺屋企靜英英，我返工好多人同我打牙骹吖嘛，而且賺多啲錢唔好咩。」又強裝話自己日踩十幾個鐘唔辛苦，簡單幾句已經充滿洋蔥。
蘇恩磁飾演慈母。為咗愛女嘅學費多打幾份工。呢場後巷洗碗戲好感人。

Erica接受訪時坦言自己都好鍾意同蘇恩磁呢場後巷戲：「嗰場戲我自己都好感動，好多人作為仔女，對住父母都好少將自己愛意表達出嚟，但嗰場戲絲絲終於將口硬心軟嘅狀態表達到出嚟，就算平時點唔講，嗰刻見到媽咪咁辛苦終於忍唔住。」講到同蘇恩磁合作，Erica透露對方成日會同自己分享讀訓練班嘅趣事，又會拎好多相畀自己睇，Erica表示：「我覺得佢好有趣、好親切、好 nice。其實拍嗰陣我真係覺得佢就係我媽咪，可能因為疫情期間我太耐冇返過屋企，而且佢見親我都係咁『女呀女呀』， 我都係嗌佢媽咪，個感覺好溫暖。」
現實中佢哋都係以母女相稱。
而演齡長達 47 年、憑處境劇《愛.回家之開心速遞》「二太」一角入屋嘅蘇恩磁，今次飾演實幹老實慈母別具說服力，並將傳統好媽媽嘅「好女兩頭瞞」演繹得相當到位，對此蘇恩磁表示：「可能《愛.回家》做得耐咗，大家對二太 特別有印象，其實我之前都演過好多唔同角色，同埋我呢幾年比較少拍正劇，今 次好開心可以同好多新演員合作，佢哋都好乖好聽話。」

佢又指同監製方駿釗合作得相當愉快：「我同佢合作得好好，之前喺《跳躍生命線》我係演一個野蠻奶奶，呢啲角色我都好鍾意做，不過呢幾年冇乜機會去做。」提到同陳嘉慧喺後巷嘅感人場口，佢話監製同導演睇完都覺得好感動，而自己睇完亦感動到喊。

《你好，我的大夫》逢星期一至五 20:30 翡翠台