廖碧兒貼與外籍男對望照似有新戀情 稱揀另一半對方要識品酒

廖碧兒Bernice呢日出席一個品酒活動，身為專業品酒師嘅佢，除咗要打理自己嘅酒品同餐飲生意外，最近仲回歸校園讀書，不過佢嘅課程就要去到唔同地區上堂，其中一個仲係戰區以色列，Bernice就話好彩當時都可以安全離開。

嚟緊12月就會喺新加坡舉行畢業禮，Bernice話完成呢個課程後要唞下先，因為佢話今次呢個課程成日都要周圍飛，加上之前喺疫情期飛令成件事好麻煩，佢仲笑言因為咁令佢喺飛機上嘅經歷多咗好多呀。

之前Bernice喺自己嘅YouTube片入面，貼出一張佢同外籍男對望甜笑嘅相，令人聯想佢係咪有新戀情。呢日Bernice被問到擇偶條件？佢就話如果對方識品酒嘅當然會加分，另外就係要鍾意小動物同照顧家庭呀。