獎門人台慶感謝祭｜Aimee帶隊《羅密歐》鬥吉吉之友 出力盡玩坤哥慘被圍剿

下星期日晚就係TVB台慶，而《獎門人台慶感謝祭》聽晚就會率先播出，節目後網購平台「 鄰住買 」9點起會陸續推售感謝祭貨品。今集「獎門人」 曾志偉 強勢回歸，而「羅密歐與祝英台」隊嘅 陳茵媺 周嘉洛 游嘉欣 蔣祖曼 鄺潔楹 吳子冲 同 徐文浩 ，同埋「吉吉之友」隊嘅 周吉佩 吳業坤 譚嘉儀 連詩雅 谷婭溦 何浩文 。

《獎門人台慶感謝祭》聽晚就會同大家見面

今集氣氛非常熱鬧，「羅密歐與祝英台」隊出場時，陳茵媺帶領齊齊戴住陳豪面具嘅隊友現身，而「吉吉之友」隊出場時唔止隊型完全唔整齊，就連嗌口號都甩晒 Beat，搞到獎門人都揶揄佢哋話：「你哋係我見過最唔齊嘅一隊！」

吉吉之友隊慘被恥笑毫無隊型

首個遊戲「開心無敵啜乒乓」，首次亮相《獎門人》嘅Aimee玩得相當落力，同吉吉對戰時仲拍枱、叉腰同露狠樣先發制人，可惜氣勢勁就技術一般，最終不敵。而嘉洛就被安排同麥美恩對戰，「餓女」上身嘅Mayanne以肉嘴發動猛烈攻勢，不過嘉洛反應敏捷最終一啜入口成功逃離魔嘴！

Aimee本來打算以氣勢嚇窒吉吉，可惜最後戰術未取得成功

之後嘅「開心無敵口噏噏」環節一樣搞笑，中文非常麻麻嘅Aimee獲製作組悉心安排英文版「Su mi ma sen，I want omakase」題曲，雖然Aimee已經手口並用，不過負責估嘅蔣祖曼一樣聽到一頭霧水！至於坤哥同吉吉挑戰魔王級「米米問美美買米未？美美話媽媽叫佢咪買米，去買mic先買米」。轉數快嘅吉吉神推理出句子同「米」字音有關聯，最終竟然極速估中答案。

遇到咁嘅題目估中嘅機會真係低過中六合彩

「開心無敵爭櫈仔」環節戰況非常激烈，坤哥為幫隊友過關，竟然由細細粒嘅鄺潔楹手中監生搶走櫈仔，引發全場嘩聲四起之餘又慘遭圍攻。鬥到最後剩低Aimee同吉吉上演隊長之戰，全晚表現活潑嘅Aimee繼續發揮Aimee，「祝英台」上身大晒好身手，唔止飛撲搶櫈搞到碌地， 更出盡九牛二虎之力將吉吉力壓地上。

坤哥求勝心切，竟然對Judy下手，最後慘被圍剿

《獎門人台慶感謝祭》星期日晚 20:00 翡翠台