重頭新劇《巾幗梟雄之懸崖》最近正喺橫店馬不停蹄拍攝中；不過除咗努力工作之外，台前幕後同樣喺工餘時間參加各式各樣嘅聯誼活動，減壓之餘順道寓工作於娛樂。日前《巾幗》嘅監製 方駿釗 就同劇中演員 關嘉敏 陳楨怡 莊思明 葉泓聲 仲有 莫家淦 ，以「兩男三女」陣容代表劇組參與「橫店馬拉松」，組成小隊完成4公里歡樂跑。

監製方駿釗同《巾幗》幾位台前幕後日前一齊參與橫店馬拉松

幾位藝人都係首次喺橫店參與馬拉松賽事，而莊思明同陳楨怡更係人生首次落場。「橫店馬拉松」每年都會邀請正於當地拍攝嘅各大劇組參與，現場氣氛熱鬧，劇組都會響應之餘，亦會帶備「劇集Banner」為作品吶喊助威，難怪思明、關嘉敏同Keith都大讚現場氣氛好喇。

幾位女將越跑越開心，仲話好似跑到去上海一樣

《巾幗》成員為咗今次比賽清晨5點就集合，眾人圍繞橫店影視城跑步。提到今次參與感受，佢哋仲話非常難忘沿途美景，關嘉敏更笑言跑完後恍如去完上海旅行：「咁啱嗰日天氣好，我哋仲要跑埋去橫店影視城嘅夢外灘， 因為沿途會經過好多上海特色建築物，感覺就好似去完上海咁。雖然全程得4K(4公里)，但好似跑咗好耐咁，因為都用咗好多時間影靚相。」

現場氣氛非常熱鬧，唔同劇組都分別派出代表參加

而思明就話：「我哋每經過一個點就會停低影相，結果用咗成40幾分鐘先跑完。」根據關嘉敏嘅片段所見，佢同思明仲有Celina最後衝刺前相當興奮，唔止一邊拍片留念、仲一片瘋狂喪嗌衝過終點，完全感受到當時有幾「歡樂」。

三位女士拍住片衝線，唔講以為佢哋完成全馬呀

而莫家淦就話：「橫店嘅風景真係幾靚，我哋跑嗰段路係小鎮，大會封晒路畀我哋跑，沿途都幾舒服，又乾淨、山景又靚。」並笑言係人生最忙嘅一次馬拉松賽事：「沿途主要係影相同拍視頻，所以比一般馬拉松仲忙碌！」繼去年《狀王之王》後再次踏足橫店拍鄗劇嘅Keith，坦言身處當地最開心嘅，係大家唔使開工時，都會相約聯誼，又會互相介紹朋友俾大家認識： 「始終住埋同一間賓館，感情係會好啲。加上嗰度拍劇場地靚、景又大，喺嗰個環境做戲、尤其民初戲就更易代入到。」

由騰訊視頻及無綫電視聯合出品嘅《巾幗梟雄之懸崖》，演員陣容有黎耀祥（祥哥）、胡定欣、蕭正楠、羅天宇、陳曉華、李成昌、韓馬利、杜燕歌、謝雪心、莊思明等。《巾幗》劇組喺橫店馬不停蹄進行拍攝，助理總經理（戲劇製作）曾勵珍及製作部總監（戲劇製作）徐正康日前專誠前往橫店探班，為台前幕後打氣，珍姐自掏腰包請食飯，氣氛愉快，視帝祥哥期間亦有萬歲請大家「喝飲料」。

大家忙裡偷閒食飯放輕鬆，相當愉快。

講到珍姐及徐生探班，祥哥受訪時表示：「今次冇乜時間帶佢哋去玩，係最後一晚珍姐請大家食飯，佢睇咗片之後都好滿意，覺得成個製作都好唔同，既有TVB嘅特色，又有內地製作上嘅配合，好有大片嘅感覺。」祥哥透露是次拍攝行程十分緊密，差唔多日日要開工：「冇乜時間叉電，有段時間係A、B組咁拍攝，拍完A組就過B組，有時早咗少少收工就出去食飯。」提到與胡定欣第八度合作， 祥哥稱喺TVB合作最多嘅女演員就係定欣，所以今次合作好有默契，大家一齊食飯，工作上又會交流吓。

祥哥都有萬歲請大家飲嘢！左起：莊思明、馬海倫、黎耀祥、曾勵珍、關嘉敏、邵初、徐正康、編審張華標、監製方駿釗

祥哥又指今次同好多內地工作人員合作，畀到佢好新嘅衝擊：「呢度地方比較大，個景豐富啲，戲劇嘅效果都會加強咗，同埋監製（方駿釗）對我哋好好，佢專登安排啲飯盒係少啲油、鹽、糖，通常係三菜一肉比較清淡啲，大家食得好習慣。」祥哥雖然喺橫店工作好忙碌，但佢一有空就會出動食嘢慰勞自己，祥哥日前喺社交網介紹橫店港式茶餐廳，更成枱都係香港地道美食，有咖哩魚蛋、魚蓉燒賣、菠蘿包及叉燒等，祥哥全程大大啖食不停，相當滿足！

祥哥為大家介紹橫店嘅港式茶餐廳，祥哥食唔停口，睇嚟好滿足。

定欣受訪時坦言日日要開工：「呢套劇通告好多好密，真係好少機會出去食飯，珍姐同徐生嚟咗大家可以早啲收工，大家一齊食個飯放鬆吓，如果唔係真係冇乜機會。」定欣又指開工頭一個月特別忙：「我嘅銀行主景要連開十幾 日，之後亦有唔同嘅景連開幾日，第一個月真係好辛苦，冇乜點休息過，內地 有說法叫頂天立地，即係頭場去到尾場都係你！」一向熱愛做運 動嘅定欣，今次帶備運動裝都得物無所用：「自己帶嚟嘅運動衫都冇郁過， 反而一有時間盡量瞓番多啲叉電。」

徐正康、珍姐和方駿釗工作認真。

定欣透露今次角色對體力、精神消耗比較大，拍攝期間消瘦不少：「今次唔使做運動都消瘦咗，啲衫褲都鬆咗，係真係開住工瘦！我本身少食澱粉質，但拍呢套劇消耗比較大，所以一定要食飯，但係消耗實在太大，食完飯之後，拍完一兩場就已開始肚餓！」至於今次再與視帝祥哥合作，定欣坦言：「同祥哥合作咗好多次，對上一次係《公公出宮》，隔咗一段時間，每次同佢合作都係一個學習機會，好似再上堂咁。今次嘅角色同以往好唔同，要應付好多大場面同 長對白，祥哥係一個好好嘅 Model，畀我去好好學習。」
劇組氣氛融洽。祥哥指監製方駿釗專登安排啲飯盒係少啲油、鹽、糖，通常係三菜一肉比較清淡啲，大家食得好習慣。