日本18種住法丨李佳芯入住凶宅最爆！借宿百年歷史京町家＋參觀大阪公屋

李佳芯（Ali）與周吉佩（吉吉）主持旅遊節目《日本18種住法》由11月13號起、逢周 一至周三晚10點半翡翠台播映，女神李佳芯與住家男吉吉呢對新鮮組合將深入日本各地，以真人騷形式體驗當地人各種居住模式，為觀眾呈獻日本社會最真實生活面貌。喺日本來自唔同階層嘅人因唔同人生目標、需要同背景，對「住」嘅選擇截然不同， 李佳芯與吉吉喺節目中將分別入住京町家、寺院、窮人日租房、網吧及車中泊、市區古怪層疊屋、郊野荒屋及京都傳統民宿等，最爆係李佳芯連凶宅都唔放過！


李佳芯同周吉佩去到日本體驗18種住法，Ali入住凶宅。Ali仲會入住寺院。吉吉則有試住網吧。

第一站，吉吉帶大家參觀只有 602 呎嘅一戶建。

Ali 就去咗京都嘅京町家。老爺爺冧妻有一手。Ali 好 enjoy 住呢間屋。

聽晚（13號）播出第一集主題係「幸福」。喺香港買地起屋看似遙不可及嘅事，但係喺日本普通人家可以擁有「一戶建」，一戶建即係一家一戶一棟，吉吉到訪一間一家四口居住嘅特色一戶建，闊度13呎、面積602呎嘅三層房子卻設計得似有千呎空間！吉吉發現三大驚喜位，第一係設計師善用 15 呎高嘅樓底、以半層半層嘅形式設計成三層；第二係廚房底下暗藏大型儲物空間、足足企到4個人；第三係超乎想像嘅專業廚房及超大浴室！

Ali 化身「阿信」幫忙打掃。屋主平日淋吓花打吓太極享受慢活。

另邊廂李佳芯喺京都借住又窄又長嘅百年歷史京町家，該所房子由一對年過八旬嘅老夫婦擁有，李佳芯入住期間「阿信」上身幫手抹地、淋花及下廚，佢同老婆婆學習耍太極體驗慢活；至於看似內儉、實則係寵妻狂魔嘅老爺爺，更即場獻唱日本老歌及英文歌《You Are My Sunshine》冧妻！李佳芯被呢對鶼鰈情深嘅老夫婦感動， 有感而發「老歌、老伴、老屋。陪住自己超過半世紀，成間屋最重要嘅，當然係另一半。日子雖然過得平凡，但係就好幸福」。

Ali 化身裝修工匠。Ali 化身裝修工匠。Ali參觀被當地人嫌棄嘅公屋。Ali 仲幫手送外賣。

後晚（14號）播出第二集主題係「夢想」。李佳芯去到大阪參觀當地公屋「團地」，團地係戰後日本政府建築嘅集合式住宅，因為面積細及設施殘舊而被嫌棄，管理機構為咗吸引更多年輕人入住，邀請一班裝修工匠免費為住戶提供工具與手藝為房子扮靚。李佳芯參觀期間化身裝修工匠親自磨木及髹油，之後仲去到女戶主開設嘅餐廳幫忙送外賣，為活化老區出一分力！

吉吉就去咗體驗車中泊。吉吉不敵冰水，凍到縮縮吓。夜晚仲可以自己煮晚餐。

吉吉則去長野跟着嚮往自由嘅八山悠太體驗「車中泊」，現年39歲嘅悠太 2 年半前花咗3個月時間及900元美金，親手製作居住面積只有26呎嘅流動屋。吉吉與悠太駕車到溪邊玩水，惟吉吉被冰凍水嚇怕：「我諗啲水低過八度，我都係喺側邊玩水算！」 吉吉大讚落水嘅悠太「真男人」之餘，不忘自嘲：「我唔係，我仲要歷練！」吉吉仲幫手準備晚餐，談到車中泊體驗，吉吉有感而發：「真係有種洗滌心靈嘅感覺，雖然（車中泊生活）物質上（享受）唔係好多，但嗰種嚮往自由嘅感覺係令我好有啟發。」

放煙花，夠晒 Chill！

《日本18種住法》逢周一至三晚10點半翡翠台播映