第20屆亞洲電影節民日舉行閉幕禮，兩套閉幕電影嘅一眾主演葛民輝、鍾雪瑩、ANSONBEAN同、袁澧林同謝咏欣等都有現身出席。

近年較少電影作品嘅阿葛，講到今次接拍嘅原因，佢話因為同片中有好多有趣嘅新人，仲讃鍾雪瑩嘅演出相當好，又恭喜對方憑《填詞L》而提名第60屆金馬獎「最佳女主角」。鍾雪瑩就話自己冇諗過可以飾演對方嘅女兒，仲爆自己細個時有打過去阿葛主演嘅電台節目，但當時只係講咗幾句就畀對方收咗線。

呢套首部關於粵語歌詞嘅電影作品，早前喺亞洲電影節公佈閉幕電影時，就被發現改咗戲名，阿葛就話新戲名入面個「L」有多重含意，仲畀觀眾多咗好多幻想空間呀。

袁澧林同謝咏欣主演嘅電影就入圍今屆金馬獎嘅「最佳改編劇本」同「最佳新演員」。袁澧林話上年自己想接拍好電影，亦幸運地有唔少好劇本搵佢演出，佢指因為呢齣電影嘅故事好吸引到佢，所以就答應演出。而首次拍長片就被提名「最佳新演員」嘅謝咏欣，就表示自己好興奮同緊張，未去過台灣嘅佢，表示到時會同電影團隊一齊參加頒獎禮呀。對於同吳慷仁飾演父女，袁澧林同謝咏欣都對對方讚不絕口，亦令佢哋有唔少得着呀！

袁澧林（Angela）、羅永昌導演日前為港鐵拍攝廣告片段，二人片中飾演父女盡曬父女情，片中更提及進夢的情節，勾起Angela讀書時期的回憶：「我以前住粉嶺都會成日搭『火車』，每次經過大學站爸爸都會話第時叫我讀呢間大學，點知我唔夠叻，去咗九龍塘間大學度讀，呢啲都係成長嘅回憶，不過依家講『火車』好似好舊咁，曝露年齡嘅字眼。」袁澧林就話同羅導早於電影合作，覺得對方好慈祥，幸好未見識「惡死」的一面。

Angela表示自己在傳統家庭長大，試過與家人冷戰：「以前到食飯『側側膊』扮冇事，不過依家大個女喇，學識講『我愛你』同『對唔住』，同埋我屋企負責講無聊嘢，令到大家好融洽。其實我爸爸好得意，佢有睇實體報紙嘅習慣，佢會剪低我啲新聞，同埋佢覺得上報紙就係『勁嘢』嚟嘅！」呢日拍攝非常趕急，要配合鐵路班次，每個鏡頭都似打杖追時間，Angela毫不介意在月台「換衫」轉妝，非常專業：「細個排球隊我可以人地睇唔到嘅情況下換衫，剛剛用咗呢個技能出嚟，真係好癲咁『Quick Change』。」

而羅永昌導演就話現實中屬「暖男爸爸」，除了對太太溫馨外，亦會體諒兒子的感覺：「其實導演同我傾呢條片，我發現好似同仔仔嘅關係，爸爸唔係大晒，依家後生有自己世界，都要學識同佢講對唔住。」羅導笑言幕前比幕後輕鬆，笑言因為等埋位時沒太多事兼顧，可以與台前幕後傾閒偈：「我同Angela冇父女相啦，佢咁靚女！以前我係第一個正途申請喺西鐵拍電影嘅人，當年係小齊同千嬅做嘅，依家地鐵發展到咁多條線，仲要用『地鐵』呢個詞真係老啦！」

袁澧林羅永昌拍港鐵廣告月台綻放「父女情」袁澧林羅永昌拍港鐵廣告月台綻放「父女情」