周潤發 唔止最愛平民美食，唔少公眾都會喺唔同老店遇上發哥身影，而佢近年一有空閒時間就不時會喺唔同山徑或者跑步熱點現身，全身投入運動嘅佢保持一副好體格，呢日仲再次參加比賽，同一眾參加者齊齊參與港珠澳大橋香港段半馬拉松，最終以2小時27分56身完賽，非常利害呀。

發哥衝線後依然非常輕鬆，被傳媒圍訪時仲表示滿意自己嘅表現，佢又大讚呢日天氣好、風景又好，仲講笑話一直同為自己打氣嘅跑友揮手打招呼仲攰過跑步咁話。一向幽默嘅發哥又話學足天王 黎明 話齋，準備空肚去食早餐，叫大家快啲早完訪問要去食嘢醫肚呀。

雖然有唔少老友都會跟發哥跑山練氣操體能，不過呢日發哥就指比賽唔能夠迫同行參與，因為大家嘅日程都非常忙碌，只可以自己主動報名呀。精神十足嘅發哥唔止早前現身釜山影展時多謝「老家」TVB，就連呢日一早跑完比賽，仲話大把精神欣賞一陣就播出嘅《萬千星輝賀台慶》呀。

雖然呢日以非常滿意嘅成績完賽，不過發哥提到未有打算越級挑戰全馬比賽，認為自己體力未能應付，反而來年1月舉辦嘅渣馬就會再次出戰半馬賽事呀。發哥又提到暫時未有片約在身，亦恭喜 楊紫瓊 同 梁朝偉 近來接二連三咁獲各大影展嘅殊榮，仲話如果有片商邀請合作自己一定奉陪咁話。

呢日 胡諾言 亦都有參與比賽，仲話太太一早已經交託任務，叫佢要聚精會神準備捕獲發哥合照，不過胡仔就話現場安全最緊要，見到發哥都係揮手打個招呼就夠喇。

台慶劇《叠影狙擊》，今晚九點半翡翠台播映大結局。最期待的畫面要數曉晨與梁曦兩姊妹，在貨𨋢以手槍互相對峙的壓軸「無間道式」對峙！周秀娜受訪時自言該幕戲印象深刻：「我要演晒兩姊妹，嗰場戲淨係換衫都換咗幾次，加上梁曦要解釋點解設局攞曉晨身份，同埋又要發洩情緒，表現癲癲哋嘅狀態！我又拍咗好多take，揸槍之餘仲要兼顧做戲好攰！」

談到姊妹持槍對峙一幕，有幾分似電影《無間道》中梁朝偉、劉德華的天台對峙戲，周秀娜說：「《無間道》咁經典，大家睇到呢啲場面當然會諗起套戲，我知道導演好鍾意《無間道》，唔知係咪特登致敬呢？」至於大結局其他重點，自從梁曦霸氣回歸兼被揭是金先生一手栽培的金夫人後，她先殺害沈飛飛（朱鑑然飾），再耍計令晟杰、曉晨陷入困境，究竟今晚曉晨能否避過一劫？深愛着曉晨的晟杰和文諾亦會決一死戰，最終曉晨情歸何處？

重溫昨（6日）晚一集，Mag姐（張慧儀飾）、「金先生」楊俊傑（關禮傑飾）被警方發現洗黑錢罪證，Mag姐向警方供出梁曦（周秀娜飾）是「金夫人」，由於梁曦一直扮死，借用其身份的孖生家姐魏曉晨（周秀娜分飾），則被警方邀請協助調查。另邊廂，俊傑的妻女被梁曦綁架，俊傑為此活捉曉晨，跟梁曦在貨倉交換人質，雙方爆發激烈槍戰，趕到的晟杰（黃宗澤Bosco飾）、曉晨被梁曦捉走，原來梁曦欲借涂文諾（黃浩然飾）之手殺死曉晨，並借屍還魂以曉晨的身份生活……