每年《萬千星輝賀台慶》當中嘅抽獎環節，都係全台藝員最緊張又高興嘅時候，今年就由應屆港姐 郭珮文 以包剪揼連贏 黎寬怡 同準新郎 馬國明 ，一舉獲得42萬大獎，而台慶主持仲不負網民眾望，一舉衝出台前攬攬Juliana，成功幾去年攬實 李芷晴 之後，為大家再紀錄今年台慶又一張標誌性圖片喇。

Juliana雖然過關斬將得大獎，不過就繼續保持天然呆本色，事後連受訪都仲話自己唔太相信就咁就得到大獎，仲話同馬明最後一鋪決戰時腦海一片空白，而得到獎金嘅佢仲話要請一眾好友大擦一餐呀。

而最近不時喺深圳被野生捕獲嘅 陳豪 呢日本來都被抽中，不過就大方將機會讓予即將成為老襯嘅馬明，可惜呢封大人情送到手邊都捉唔實，不過馬明就非常感謝阿Mo嘅美意喇。

而另一大獎新款電動車就由《聲夢2》嘅 趙紫諾 獲得，但係Sabrina仲未成年自然連車牌都冇，所以座駕可能就要另作處理喇。而大獎以外亦有多封大利是，但係朱晨麗就幾乎排住影靚相而錯失呢個幸運，好在跑得切返上台咋，同樣有大利是嘅家燕姐就話獎金係其次，攞到彩更為重要呀。潘靜文就再次被抽中，加上林智樂同林子超亦係幸運兒，真係見到佢哋都覺得開心喇。《聲夢2》嘅劉詠彤同樣係大利是幸運兒，仲已經決定要請大家食嘢傳播幸運，再捐助被遺棄嘅毛孩呀。

今年電視城門外一早就有大批Fans等待偶像出現，直至深夜炎明熹、周吉佩、冼靖峰同詹天文等都現身分別同大家見面，場面非常熱鬧呀。

譚詠麟（校長）、草蜢、鍾鎮濤（B哥哥）、炎明熹（Gigi）、李幸倪（ Gin Lee）、泳兒、《聲夢》學員及《亞洲超星團》香港代表丁子朗（Karl） · 冼靖峰（Archie）等一眾歌手呢晚喺紅館出席《全港歡迎中國載人航天工程代表團大匯演》。

炎明熹以一身貼身紅色長裙亮相，佢話好榮幸參與呢個咁大型嘅演出，笑談自己與太空有啲關係，今次親身見到航天員，面對面唱歌畀佢哋聽，炎明熹坦言好緊張，草蜢成員蘇志威、蔡一智及蔡一傑就想藉呢個機會向航天員探究航天知識。

B哥哥為咗呢晚演出，佢重新編曲《天籟...星河傳說》配合大匯演主題，溫拿巡迴演出由年中開始展開，校長下一站將去江門見粉絲，佢話暫時最難忘係星馬巡唱，因為溫拿最早期發跡東南亞就係喺馬來西亞，當年因青春勵志喜劇《大家樂》帶畀大家知道溫拿各人嘅性格，校長回想星馬粉絲真係支持佢哋好耐。

丁子朗、黃奕斌（Hugo）、冼靖峰、文佐匡（Sean）、洪欣兒子張鎬濂等首次踏上紅館舞台載歌載舞，節目召集人曾志偉亦喺後台為佢哋打氣給予鼓勵；丁子朗呢晚又要表演跳唱、又要擔任司儀，經過之前不斷鍛鍊，佢好淡定接受挑戰，而黃洛妍就喜與涂毓麟及牛牛合作演繹《A Million Dreams》。