發達有心得？堪輿學家麥玲玲同兩位J2ers 黃紫恩Jojo、吳兆麟Alan將會喺22號播出嘅《玲玲友情報》，請嚟有「好老闆」之稱嘅上市公司主席陳洪楷，分享投資同慳錢致富嘅心得。
今集請嚟有「好老闆」之稱嘅上市公司主席陳洪楷，同大家分享投資同慳錢致富嘅心得。
陳洪楷自言未發跡前，試過封5,000元作為好朋友結婚人情，當時人情「公價」普遍為 1,000 元左右，收人情嘅好友到依家仲經常被提起。而玲玲師傅就話係值得，跟住佢掐指計數，邊數邊話：「C 君(鄭詩君)結婚我都畀咗......」屈起手指足有7隻，意味住人情有過百萬？玲玲師傅續講：「C 君自己都話啲錢夠首期買樓，佢係我徒弟，無計嘅。」令在場眾人都艷羨到流口水，玲玲師傅笑言就算有錢，亦未必人人捨得花，指有唔少有錢人都很節儉。
陳洪楷自言未發跡前，試過封5,000元作為好朋友結婚人情。
玲玲師傅接受訪問時澄清，節目內容係同C 君慣常開嘅玩笑，佢大笑話：「嗰時C 君玩整蠱電話，話要結婚不過無錢畀首期，叫我幫佢畀。明知佢玩電話，我話好呀，你去揀樓啦。之後佢成日同人講我幫佢畀首期買樓，其實只係封咗10萬蚊人情。」講到佢哋嘅師徒關係，原來始於主持新城電台節目，玲玲師傅讚 C 君聰明且頗有慧根，所以二人屬半份師徒關係。
玲玲澄清當年係封咗十萬人情。
對於玲玲師傅嘅超大封結婚人情，令主持之一嘅Jojo羨慕不已，佢半開玩笑咁話，如果將來擺酒無論如何都要請對方：「其實我成日叫師傅介紹男仔畀我， 分分鐘佢做埋媒人，所以好大機會實請埋佢。」Jojo 話對儲錢冇心得，但相信迫到埋身唔夠錢用，自然會努力搵錢。

《玲玲友情報》逢星期三 23:00  J2 82台

麥玲玲 帶領 黃紫恩 蔡景行 同 陳欣茵 主持嘅《玲玲友情報》，29號播出嘅一集會同大家討論吓「讀書唔係咁樣讀」嘅話題，元祖級補習天后 June Leung 再次擔任嘉賓。為人父母最關心嘅莫過於子女學業，深信讀得書就有好出路。

今集節目玲玲師傅會同大家由面相分析，仲原來讀得書確實有樣睇，好似耳仔高過眉代表聰明、記性好；耳仔生得後同低代表鹹濕。而眉毛整齊又靚，表示執行能力同計劃能力強，額頭高而飽滿唔止讀書叻，而且官祿運非好，將會有高薪厚祿。

元祖級補習天后 June Leung 再次擔任嘉賓

師傅就自爆老公讀書勁叻，中七未畢業就以資優生身份升讀大學喇。 玲玲師傅接受訪問時大爆老公年年考第一嘅威水史︰「佢唔係名校出身，喺香港仔一間工業學校畢業，嗰時諗住畢業係樓梯底整電器。」因為成績優異，所以中五畢業後以資優生資格入讀理工，之後再跳入港大修讀孖E學系(電子工程系)。

師傅補充話︰「本來醫科都收咗佢，但係佢鍾意計數，佢係第一代從事寬頻嘅電子工程 師。」師傅直言老公具備「讀得書」面相，包括耳仔高、眉毛齊同具「狀元」命格。佢仲話唔少客人，特別係港媽最關心子女係咪讀得書，但係師傅語重心長指出︰ 「我會直接講得定唔得，其實讀書只係其中一樣，小朋友可以有好多樣才能。父母都設身處地諗下，自己細個讀書係咪咁叻，對自己有冇咁樣要求先。」

Jojo爆因媽咪當年親自身體力行，令自己發奮讀書

節目中Jojo自爆原本對讀書毫無興趣，不過自小學一年級開始，因為媽咪一舉動令自己大受感動︰「小一入咗間英文小學，讀書唔係太好，自此一返屋企就喊，有日媽咪忽然將我托管咗畀鄰居阿姨。有幾個月嘅星期二，每晚媽咪都會準時喺屋企消失。」

最後謎底解開，Jojo發現屋企多出一份學校英文教材，先知道媽咪每星期返夜校學英文。受媽咪身體力行感召，Jojo就自此再冇一刻想放棄學業。

《玲玲友情報》逢星期三晚 23:00 J2(82台)