星光路上丨陳茵媺憶復出拍劇過程爆喊 罕談當年留意陳豪原因

星光路上丨陳茵媺憶復出拍劇過程爆喊 罕談當年留意陳豪原因

陳茵媺(Aimee)與陳豪(阿Mo)於2013年結婚,婚後慢慢淡出幕前,三年抱三,Aimee專心相夫教子,相隔10年出山拍TVB劇集,Aimee近日接受TVB娛樂新聞台節目《星光路上》,與主播潘盈慧暢談星途,坦言未選港姐前已對呢行有興趣,不過Aimee父母認為至少要大學畢業,再決定自己想做啲咩,畢業後就決定參選港姐,於2006年獲得港姐冠軍及「國際親善小姐」獎。

Aimee最難忘係嗰年爸爸可以上台一齊揭曉賽果,當時爸爸安慰佢要順其自然,後來Aimee順利入行發展,佢最記得有次做大騷司儀首次跟肥姐沈殿霞合作,完騷後獲肥姐稱讚及給予擁抱,令Aimee感到好溫暖,Aimee後來有機會拍劇,首次拍劇《同事三分親》演羅樂林女兒戴銀來,而拍《烈火雄心3》有多啲動作戲,當時佢有場戲講佢同黃宗澤由4樓跳落去。

Aimee拍《羅密歐與祝英台》要接受好多挑戰,原來佢試過忍唔住爆喊,有次佢同老公陳豪講唔覺得自己會做到,又覺得自己做得唔好,Aimee憶起當刻情景又再次爆喊,感謝監製陳維冠(Joe)鼓勵……

Aimee喺未同阿Mo一齊之前,有聽過人哋講阿Mo同女仔通常保持距離,亦有記者朋友大讚阿Mo,令Aimee開始留意阿Mo,二人喺拍劇期間冇咩交流,直至二人喺食宵夜期間就多咗時間認識對方,不知不覺就走埋一齊,Aimee一開始以為生完小朋友就復出拍劇,之後小朋友出世,Aimee坦言比想像中難放手,Aimee又指今次復出令佢戲癮大發,令佢越嚟越想拍多啲劇。

星光路上|相隔16年再奪視帝平靜滿信心 陳豪自覺虧欠太太支持對方追夢

陳豪喺《萬千星輝頒獎典禮2023》憑台慶劇《破毒強人》再奪視帝寶座,阿Mo接受《星光路上》 潘盈慧 訪問,大談得獎感受同演藝路上嘅點滴。

阿Mo繼07年憑《溏心風暴》嘅「得得地」一角成為雙料視帝後,相隔16年再奪最佳男主角,佢坦言心情更平靜同有信心,而能夠喺太太陳茵媺(Aimee)手上接過獎項,更覺意義非凡:「係好special,難得由我太太頒畀我,其實最想我攞獎嗰個反而係佢。我嘅壓力係……我都想畀一個喜悅佢,但唔敢肯定畀唔畀到佢!最後宣布結果嗰吓我係開心嘅,再開心係能夠喺太太手上攞呢個獎。」

佢仲表示16年前攞獎,覺得個獎大過自己,而今次獲獎,自己嘅目光已經唔係只在獎項,最重要係印證自己所走嘅演藝之路係正確。
     
入行30年嘅阿Mo演藝之路曾歷高低,由模特兒走入電影圈,起初只係抱住搵錢心態「雙線」發展,後來覺得做模特兒既空虛又唔實在,所以先決定向演戲進發,可惜喺電影事業上發展未如理想。

雖然阿Mo有感心灰意冷,但佢都未有放棄,一直默默裝備自己,等待機會來臨,直到加入TVB,阿Mo有機會參演《妙手仁心II》,更自爆劇中經常「插袋」扮有型嘅原因,又話拍首部古裝劇《洛神》幾乎每一句對白都NG 50次以上,唔了解四字成語嘅佢,更將「瞻前顧後」講成「擔前顧後」,幸獲拍檔鄭子誠提點。

最後阿Mo隔空向Aimee發表愛的宣言,感謝對方願意喺事業黃金期時選擇結婚、為他生兒育女,並自覺虧欠太太:「我好支持佢出嚟拍戲,尤其小朋友開始大,想佢追求番自己夢想。」

 相關推薦

熱門搜尋