無垠之疆丨陳貝兒被患眼疾BB整破防 於扎墨公路遇意外要涉水而行

陳貝兒Janis主持嘅《無窮之路III-無垠之疆》7號晚播出嘅一集，繼續同觀眾遊走西藏，分別去到阿里同林芝。

位於青藏高原西北部嘅阿里，係世界屋脊中嘅屋脊，由於紫外線指數特別強，導致當地居民嘅眼疾問題特別嚴重，有人30歲開始就患白內障，更有啲小朋友天生眼睛就出現問題。有一班嚟自陝西嘅醫療團隊喺當地進行援助，Janis深入牧區鄉村觀察援助情況，
陳貝兒見到呢個未足一歲嘅BB，眼疾唔能夠醫治後，𣊬即淚崩。陳貝兒忍唔住落淚。
當見到唔少襁褓中嘅嬰兒等睇醫生時，Janis感觸哽咽話：「好多小朋友天生眼睛有事，冇擘大過對眼，睇唔到嘢。」當中有一位未足一歲嘅BB，被判斷眼睛萎縮失明時，Janis再忍唔住直接破防落淚。
 
喺當地做援助嘅醫療團，工作亦同樣辛苦，因為疫情嘅關係，好多人已經有兩、三年冇返過家鄉，醫療隊隊長郭振軍院長喊住咁話：「去年中秋節時，跟我媽媽視頻的時候，當時我也大哭了一場，因為很虧欠家人，但我覺得阿里的百姓更需要我們，這個地方更能體現我們作為醫護人員的價值。」醫療隊嘅無私奉獻，令人肅然起敬。
醫療隊隊長郭振軍院長駐守阿里服務民眾。
離開阿里，攝製隊出發去到恍如世外桃源嘅林芝，沿途走訪了世界第一大峽谷雅魯藏布大峽谷、佛掌沙丘、索松村、布久拉康寺以及有「西藏的瑞士」魯朗林海，Janis仲喺魯朗林海遇到這次行程嘅第三條彩虹，非常Lucky！
 團隊遇到呢次行程嘅第三條彩虹。
而8號晚播出嘅最後一集，Janis同攝製隊出發去到呢次行程嘅最後一站墨脫。「入藏艱難，進入墨脫更加是生命的一場賭博」，以前要進入墨脫需要徒步五天，穿越暗藏大量毒蛇、毒蟲嘅森林，再要攀過一座海拔4,000米嘅雪山先可以進入墨脫，政府為咗幫助墨脫居民走出大山，決定建築一條扎墨公路，但由於通路嘅地段位於喜馬拉雅斷裂帶，塌方、泥石流、地震等等天災數之不盡，工程難度可謂世界級，最終耗時60年、耗資20多億工程費才完成。Janis駕車駛入全國最難建築嘅扎墨公路，期間遇到小意外，其中有條橋無故被大石擋着，令到Janis要兜路涉水而行，相當驚險，難怪Janis大嘆：「呢條路起嗰時已經好困難，揸呢條路一樣唔容易，真係要打醒十二分精神！」
 遭石頭擋路，令Janis要兜路涉水而行。
穿過117公里嘅扎墨公路後，終於去到目的地墨脫，Janis走入藏於山中嘅格林村同背崩鄉，體驗少數民族門巴族的生活兼大歎門巴農家菜，Janis對當地名菜石鍋雞情有獨鍾，好味嘅秘方原來是歷史悠久的脫墨石鍋！行程尾聲，經歷了2個月新疆、西藏自駕遊，走了14,019公里的車程，Janis將會分享今次旅程的心路歷程，大家記得留意《無窮之路III-無垠之疆》。

《無窮之路III-無垠之疆》最後兩集  星期四、五 22:30 翡翠台