葉念琛身兼編劇、導演同監製嘅愛情新片《不是你不愛你》，星期四就正式上映，今次唔止有 台灣型男 陳昊森 同 譚旻萱 嘅淒美愛情故事，一眾客串演員亦相同當吸引，其「第8代阿寶」 蔣家旻 同型男 馬志威 亦相隔10年後再扮演一對情侶。
蔣家旻今次喺《不是你不愛你》電影中，飾演女主角「阿寶」嘅表姐「碧玲」，而「童年阿寶」見證佢同馬志威飾演嘅男友「志龍」，由恩愛甜蜜到嘈交分手，愛情觀仲深深影響成長後嘅「阿寶」甚至係故事發展。
拍攝當日Angel同Edward情侶裝現身，雖然已經足足10年冇見面，不過默契依然十足，無論恩愛互攬，定嗌交互摑，都非常信任對方。其中一幕，Angel向偷食男友逼供，一言不合互相拉扯，蔣家旻被捉住手臂後大力反抗，結果留下一手紅印，Edward亦不停道歉。
Angel就話：「除咗你我唔會畀其他男演員咁掂我架！如果其他男演員整到我咁樣紅晒，我一定唔會饒恕佢！」Edward亦賣口乖答：「我都唔會饒恕佢！」。
蔣家旻同馬志威早喺2013年，同樣由葉念琛執導嘅《第一次不是你》擔任男、女主角，亦係佢哋嘅首次電影演出。Angel成為葉導嘅「第8代阿寶」，電影講述呢對小情人失散10年後重遇，而現實中Angel同Edward相隔10年再喺《不是你不愛你》重遇。
相隔10年再演情侶，Angel話：「10年前我哋有好多親熱戲，當時大家都會好緊張，但經歷過之後真係熟絡咗好多，互相信任。雖然10年來冇乜接觸，但剛才嗰場戲要我哋要互摑對方，事前私底下已經溝通好，盡情咁摑埋嚟啦！當然都會好錫住對方，好驚會整親對方，結果冇事啦，只係幾takes就搞掂。」
而鬼馬嘅Edward被問到如再有機會合作想扮演咩關係時，竟答到：「母子啦！講笑啫，其實今日只係兩場戲但好開心，可惜唔夠喉。」