人夫陳家樂期待派利是 婚後首個情人節冇部署

陳家樂日前獲邀出席一個可持續時裝設計競賽活動，家樂覺得呢個係好好嘅環保概念，將一啲舊嘅衣物回收再重新設計，亦都可以將一啲可能過咗時嘅衣物加入新元素，令到時裝感覺再一次散發出嚟。又或者用一啲唔同嘅配搭去令到嗰件衫可以再着多幾次，散發另一番嘅味道。家樂覺得只要配搭得宜，舊衫係可以循環再着多幾次。

陳家樂日前獲邀出席一個可持續時裝設計競賽活動。

家樂舊年同連詩雅結婚成為人夫，佢哋就嚟迎接婚後首個農曆新年，家樂話：「以前同佢拍拖嘅時候，我封我姓陳嘅利是封，佢有佢自己嘅靚靚利是封，今年我哋統一用一款利是封，大家一齊去揀選屬於我哋嘅利是封，個感覺都幾特別，感覺我哋係一條team。第一年真係一個家庭咁樣去派利是，都幾期待。」農曆新年後緊接情人節，同時亦係佢哋婚後首個情人節，不過家樂坦言「冇部署」，「因為我而家拍緊一部電影，希望完咗之後會同佢去到一個旅行。呢套電影都籌備咗一段時間，喺造型上有啲改變，要減肥，佢一路都陪我進行地獄式節食，所以完成呢部電影後希望可以同佢放假，情人節去一個旅行，食返餐飽。」

家樂舊年同連詩雅結婚成為人夫，佢哋就嚟迎接婚後首個農曆新年。

講到唔少觀眾大讚佢喺電影《金手指》中嘅演出，家樂話有份參演已經很開心，觀眾留意到自己就更加係喜出望外，佢話「今次有一個大家留意到我嘅一個角色，自己好感動，因為能夠喺咁多角色入面可以俾到深刻印象觀眾，好受寵若驚。亦都好多謝俾咗好多鼓勵我嘅導演，同埋兩位超級巨星：劉生（劉德華）同梁生（梁朝偉），有佢哋嘅演出先至會帶動到其他嘅演員可以交出一啲更加好嘅表現，因為有佢哋一啲咁好嘅演員，我哋先至會可以提升到自己嘅狀態，所以好多謝導演同埋兩位前輩。」

講到唔少觀眾大讚佢喺電影《金手指》中嘅演出，家樂話有份參演已經很開心。家樂覺得只要配搭得宜，舊衫係可以循環再着多幾次。