岑麗香戲癮大發準備復出 留港度歲教兒子傳統文化

岑麗香喺2021年生咗細仔後就減產專心湊小朋友，兩個兒子開始長大，香香終於放心可以復出拍劇。香香趁出席活動時就放風話自己咩類型嘅角色都想做，佢直認有戲癮，加上休息咗一段時間，成個人好似有番新鮮感，乜嘢都想試吓做，又話自己每次睇劇時就係最想拍劇嘅時候。

香香喺加拿大長大，一直都希望兩個兒子學習中國傳統文化，嚟梗嘅農曆新年，香香留港度歲，佢依足傳統行花市買年花，同家人食團年飯，仲有教小朋友寫揮春。講到出外拜年，香香話一早就教咗阿仔講賀年恭賀說話。

眨吓眼大仔Jacob經已四歲半，開始對利是錢有概念，香香話係時候要教吓大仔理財，佢畀Jacob抽咗一封利是，裏面係一張一百蚊，香香就同Jacob講唔一定要用晒啲錢，你可以選擇買玩具、儲起或者捐贈，之後佢就帶仔仔去到玩具店，Jacob就用咗三十蚊買咗件玩具，又用咗啲錢買嘢畀細佬，而剩底嘅錢就儲起，香香都話大仔好似明白咗理財嘅概念。