彭美施新作品起用三生三旦 目標帶領粵劇闖進拉斯維加斯

彭美施新作品起用三生三旦 目標帶領粵劇闖進拉斯維加斯

彭美施任出品人暨總策劃嘅第七部粵劇作品,嚟緊將喺西九戲曲中心上演,今次施姐嘗試同一齣劇起用三對當今炙手可熱嘅文武生同花旦演出唔同場次,包括打頭陣演出嘅李秋元同梁燕飛,王志良同林穎施,而梁兆明同梁非同「雙梁配」就會壓軸演出。

雖然今次三生三旦合演同一齣劇,但雙梁配就唔擔心會有比較,反而覺得大家可以互相交流、切磋。而梁燕飛就話白蛇對花旦來講係考牌戲,因為有文有武,有齊所有元素,李秋元都覺得係好大挑戰;當中最有經驗嘅一定係林穎施,事關佢演白蛇經驗豐富,起碼超過20次,同王志良已經合作三次,白蛇可以話係一路陪伴自己成長!

施姐為咗今次演出費盡心思,除咗製作費投資達7位數之外,更邀請到曾演過《白蛇傳》白娘娘一角,現已離開粵劇舞台40年嘅江雪鷺擔任藝術顧問,有指施姐曾宣布做完粵劇《紅樓夢》就會收山,施姐就話決定收番呢個決定,因為佢有個新目標就係希望能夠帶領粵劇衝出海外,最希望有朝一日去到拉斯維加斯表演,畀外國人見識下廣東粵劇嘅精髓。

馮寶寶返港撐老友粵劇戲寶 汪明荃發揚奶奶秘方蘿蔔糕

馮寶寶返港撐老友粵劇戲寶 汪明荃發揚奶奶秘方蘿蔔糕

長居馬來西亞嘅馮寶寶,經已有一段時間無返香港,日前佢就專程返港一個禮拜,欣賞好友彭美施擔任班主嘅粵劇作品,兼且應香港電影資料館邀請擔任放映後座談會嘉賓。Bobo姐話返港七日行程好忙,又有好多朋友相約食飯,但佢都盡力而為,因為唔可以太操勞,佢話自己喺馬來西亞生活好休閒,平時瞓到自然醒,照顧吓狗仔剪吓狗毛,又會種吓疏果。至於有冇戲癮想復出拍戲,佢就話自己唔係戲癮,係視為工作,只要有好嘅劇本就會參與。

Bobo姐喺現場見到阿姐汪明荃就好熱情攬到實,仲不停叫阿姐做媽媽,因為當年喺劇集《楊門女將》中,阿姐飾演嘅穆桂英係Bobo姐反串飾演楊文廣嘅母親。難得與昔日「兒子」重聚,阿姐都好開心,話幾年無見過面。阿姐往年農曆新年都會整蘿蔔糕,今年仲搵嚟朋友合作推出市場賣,阿姐仲透露原來呢款蘿蔔糕嘅秘方係嚟自佢奶奶(羅家英母親)嘅食譜。

梅小青同黎燕珊因為有事而錯失咗上次欣賞戲寶公演嘅機會,今次重演有幸入場欣賞,佢哋都大讚成個製作新穎兼無冷場,非常精彩。

 相關推薦

熱門搜尋