蕭正楠化身渣男背妻偷食直認困難 吳若希為阿蕭放老公飛機：祝年年有今日

TVB新劇《奔跑吧!勇敢的女人們》一眾演員呢日齊集電視城舉行開鏡拜神儀式，蕭正楠飾演渣男，背住老婆吳若希（Jinny），偷偷與賴慰玲發展，以幽默手法探討婚姻問題，阿蕭都話今次個角色對佢嚟講係極大挑戰，就係好難做到「渣」嘅感覺。

阿蕭坦言角色同現實生活中嘅諗法係好唔同，所以要花好多時間諗細節位，點樣去平衡第三者同大婆之間。佢再講到對手真係好緊要，Jinny為人爽朗兼且易笑，令自己覺得好似好有幽默感。Jinny就話盡量喺綵排時習慣阿蕭啲搞笑位，有時怕咗望住阿蕭演戲，因為擔心自己做唔到。

阿蕭日前同劇組喺街頭開工被網民野生捕獲，仲獲讚皮膚滑溜保養得宜，阿蕭就話要多得太太黃翠如，因為佢本身係好懶去打理皮膚，而太太就會幫佢編排好邊日用咩護膚產品。開鏡拜神撞正係Jinny老公正日生日，Jinny話將時間奉獻畀阿蕭，佢仲鬼馬咁講：「祝我老公年年有今日，開開心心，每日都好似冇老婆喺身邊咁自由。」

陳少邦喺劇中力追賴慰玲，但係女方眼中只有阿蕭。賴慰玲就話阿蕭今次令佢刮目相看，因為演繹得好好笑，仲試過自己笑到流眼水。阿蕭喺劇中鍾意一個女人，但又對另一個女人有責任，賴慰玲再次澄清自己並非小三，而係大婆，因為原先係佢同阿蕭拍拖，點知佢就同Jinny有咗BB，跟住兩人就結咗婚，之後佢同阿蕭又餘情未了，劇集題材夠晒大膽！而朱敏瀚同黃瀅仴飾演上司同下屬嘅關係，當中有唔少對手戲。朱仔早前同賴慰玲分別報考電單車強制試，不過雙雙唔合格，朱仔話如果當初強制試合格嘅話，今次喺呢套劇就可以掛「P」牌開電單車，而家要起用替身，令佢都有啲失望。