麥明詩公開與盛勁為互相求婚過程 沙灘漫步同行巨鑽作禮浪漫又搞笑

十優港姐 麥明詩 ，同曾參與《後生仔傾吓偈》同《衝上雲宵大選》嘅前民航機師 盛勁為，緋聞傳足幾年不過兩人一直未有否認，直至日前網上離奇流出兩人疑拍攝婚照，麥媽媽回應傳媒時亦非常高興之下，一對非常登對嘅情人星期三深夜正式公開佢哋即將結婚嘅喜訊，而Louisa仲一反傳統向男友求婚。

由社交平台嘅相片同影片所見，Louisa應該係12月生日派對當晚，於一眾親友見證下以名錶作禮物向盛勁為求婚，而據Keith嘅社交平台所述，原來自己早年拍拖時一句戲言，估唔到Louisa一直記住更實踐。

佢又指女友於自己事業低潮時選擇與自己同行，更對自己有無限支持，自己會一世記住。而一眾圈中好友亦紛紛送上祝賀，好似高Ling大讚佢哋有夫妻相，一對準新人就齊齊回應，甜過蜜糖。據指新人婚禮定於3月舉行。