網紅甜卡｜與黎紀君李慧茵探倫敦甜品天堂 廖慧儀見靚仔老闆嗒晒糖

結合「甜品」同「打卡」於一身嘅旅遊飲食節目《網紅甜卡》，兩位主持 廖慧儀 （Jessica）、甜品師 黎紀君 （Christy）加埋造型師 李慧茵 （Veronica），同觀眾一齊走訪甜品天堂歐洲，一探最著名甜品店同網紅打卡點，實行又食又影。

Jessica同Christy由巴黎轉往倫敦繼續探尋打卡熱點

英國是港人熱訪地點，首都倫敦打卡點眾多，更加係甜品美食集中地，兩位靚女主持繼續甜食打卡之旅。首站係學整英國淑女必備嘅貴婦帽，體現英國人注重禮節嘅一環，而喺製帽過程中，Christy就勾起昔日拍拖嘅小故事，佢話︰「嗰時原本織條頸巾畀初戀男朋友，織到一半放棄，到第二個男朋友嘅時候，心諗不如拎返第一條繼續織啦。」但最後都係被媽咪阻止咗。

佢哋體驗傳統又優雅嘅女士帽製作，Christy仲回憶起初戀

Christy同Jessica接住行程係歎地道英式下午茶，原來香港人所講嘅high tea，喺英國係指工人階層晚飯前嘅輕食，用嚟補充體力。而英國上層社會嘅下午茶就稱為Low Tea強調優雅。英國人嘅餐桌禮儀非常講究，所以佢哋亦向禮儀顧問Laura Windsor請教正宗飲一餐茶嘅方式。

開始時Christy同Jessica對拿取食物同酙茶嘅考驗都勉強過關，但當Christy豪邁咁將三文治放入口時，立即就被Laura提醒︰「Nice、small bite，ladies（女仕，細啖輕輕咬）。」到食烤餅時Christy再受考驗，原來佢用刀切餅嘅做法並不正宗。Laura表示正式應該是用手慢慢將餅掰開，再撕成小塊，刀只會用來搽牛油，連環出錯嘅Christy當然成為咗反面教材。

之後又學正宗飲茶禮儀，Christy就有啲細節被糾正喇

之後Veronica跟兩位靚女到訪名勝大笨鐘、倫敦眼參觀，目的係指導佢哋拍出與別不同嘅打卡相，又為她們配上英倫風裝扮，品嚐地道英式甜品拖肥布甸，除咗甜品之外，Christy同Jessica介紹嘅人氣麵包店British Patagonia Bakery，係主打ice-crone即係ice cream（雪糕）加croissant（牛角包）。店主Matias Barbat曾喺米芝蓮餐廳工作，貌似荷李活紅星Tom Hardy，難怪Jessica一到店已經神不守舍，佢含羞答答表示︰「入到嚟我嘅眼睛都唔知望chef好，定望啲嘢食。」身旁嘅Christy都忍唔住哈哈大笑。Matias自然聽唔明白二人對話，只係保持微笑，Matias為佢哋準備兩款口味嘅ice-crone，美食當前，佢兩個完全忘記儀態，一邊要咬牛角包，另一邊要應付融化嘅雪糕，真係有啲遴迍。最後佢哋諗出一個兩全其美方法，想知解決方法，咁就密切留意節目播映。

之後到訪一間人氣熱店時，佢哋一見到有型老闆就笑到唔識停更試食至潮雪糕牛角包

《網紅甜卡》逢星期一至五 20:30  J2 82台