狀王之王｜王浩信女裝扮相唯妙唯肖 與金剛拍互摸戲零尷尬

喜劇《狀王之王》劇情講述聰敏機靈嘅 宋世傑 ( 王浩信 飾)為深入調查「蜘蛛精殺人案」，不惜拉住阿九( 金剛 飾)一齊喬裝成「孫阿姐」同「孫九妹」潛入「倚春閣」，其間為隱藏男兒身鬧出唔少笑話，「九妹」更因遭「倚春閣」貴賓睇中「濕身」收場，當中最大受害者絕對係要近距離同二人對戲嘅姚子羚，一度笑到「擰歪面」！

浩信同金剛嘅美艷，子羚要同佢哋做對手戲真係考定力

王浩信嘅女裝演繹相當抵死，除表情同蘭花手夠晒入型入格，王浩信更主動向導演子聰要求以「東北口音」上陣，配合角色高大身形之餘，順道增強喜感，包括「佢係禾味味(我妹妹)孫九味(妹)」、「貿(冇)飯食」、「典(點)解」、「你唔巧(好)死」、「Kai(開始)始」、「獎(江)山」及「遇伏(佛)殺伏(佛)」等，加上溫柔無比嘅助語詞「喲」同刻意壓低嘅尾音，相當突出。今次Vincent首度反串扮女人，觀眾唔止受落，仲指佢皮膚白淨更大讚佢「九頭身」身形Perfect。

呢兩姊妹嘅造型加埋腔調，真係唔好食住飯睇

完全將演員包袱拋諸腦後嘅「王金CP」，之前一幕互相幫對方「調較假胸」嘅場口亦係相當抵死，金剛雖然首次同Viincent合作，不過就話零尷尬：「件事假架嘛，所以唔尷尬，可以去得盡啲。我同浩信本身係識嘅，所以更加冇障礙。」

不過金剛亦坦言扮女人，有一件事非常唔慣：「扮女裝其實都辛苦架，因為始終要戴住胸圍同埋個妝要化到好白好白，我平時唔化妝嘅，所以就覺得有啲唔自在，但成件事都係享受同開心嘅。」

平時麻甩味滿分嘅金剛，呢次仲有香艷出浴戲

至於「王金CP」嘅女裝打扮點解咁「胸前偉大」，導演肥仔聰就親自拆解箇中奧秘：「除咗胸圍之外，仲塞咗氣球同好多個墊喺入面。」

劇情其中一場，金剛需要被大隻佬演員環抱兼倒豎蔥式插入浴池，雖然動作難度系數頗高，不過金剛堅持親身上陣，佢話：「除非好危險嘅動作，否則我都會自己嚟。嗰次都好安全，一嚟個浴池啲水好深，唔怕撞到；導演子聰同劇組又好好，我記得拍嗰時都幾凍，佢哋為演員準備咗暖水池，令我哋唔使凍住同震住咁拍。子聰導演佢好識照顧演員，包括感受同安全性。」

呢集出水猩猩大家又覺得點呢？

呢場戲金剛除咗要一再跌低而爬起身，又要同大隻佬演員上演類似泥漿摔角式嘅「落水」動作；難怪金剛拍完後仲嚟返個「金剛式出水芙蓉」，「搞笑擔當」當之無愧。

而姚子羚嘅20秒耍雙刀場面同「西洋繩秒速反枱」絕技亦相當吸引，之前姚子羚喺《鐵拳英雄》中打到飛起贏盡好評，到底今次能否再憑《狀王之王》喺功夫方面令觀眾留下深刻印象? 咁就要密切留意劇情發展。

《狀王之王》星期一至五晚 21:30 翡翠台