嘉欣振朗CP飛大馬 《靈戲逼人》爆紅研究開續篇

喺《靈戲逼人》上演一段悽美人鬼情嘅 龔嘉欣 同 張振朗 近日再合體飛到馬來西亞同當地Fans見面，呢對CP唔止去到唔同場地同逼滿人嘅Fans見面，又同大家玩遊戲送禮物，更開金口為大家唱歌仔。

雖然劇集已經播完一段時間，不過佢哋一到當地就已經感受到大家嘅熱情，仲話估唔到咁受大馬觀眾歡迎，仲話要諗吓計仔推動吓再拍續集，仲已經有初步嘅構思，更話隨時可以到當地取景，不過就擔心越拍越肥喇。呢次行程咁受歡迎，嘉欣同Owen仲話希望可以繼續以呢對CP形象繼續登台搵真銀咁話。