陳美齡有孫萬事足 計劃與家人遊夏威夷

陳美齡現身首屆全港中小學生寫作比賽發布會，身為活動發起人兼評審嘅Agnes，更自掏腰包增設獎項，一向對育兒都好有心得嘅Agnes，就覺得培養小朋友讀書係相當重要嘅一環，無論係求學抑或工作都會特別有優勢，所以佢建議家長一定要鼓勵小朋友多閱讀。Agnes一向教子有方，宜架三個仔都長大成人，Agnes亦做埋嫲嫲，講起孫女佢更一副有孫萬事足嘅樣，Agnes話孫女就快一歲啦，啱啱仲學識行路添。而嚟緊嘅農曆年，Agnes因為要返日本做嘢，所以唔能夠留港過年，佢都覺得有啲可惜，不過，佢已經計劃緊今年五月，請三個仔去夏威夷旅行，共享天倫之樂呀。