黎諾懿物色直播帶貨好物 年廿七將與家人出埠滑雪

黎諾懿物色直播帶貨好物 年廿七將與家人出埠滑雪

農曆新年將至, 黎諾懿 呢日又參與直播帶貨,對於而家嘅賀年食品五花八門,諾懿都話大開眼界,所以佢帶貨嘅同時,都有幫太太物色下有咩筍貨呀。諾懿唔單止係廿四孝老公,更係廿四孝老豆,嚟緊年廿七,諾懿就會帶囝囝同埋太太一齊旅行滑雪,事關諾懿話小春雞一直話好想睇真雪,加上囝囝正學緊滑雪,所以諾懿都希望囝囝可以親身去感受下。

因為滑雪有一定嘅危險性,諾懿話自己而家年紀大骨頭脆,所以玩呢啲高危活動,都真係要加倍小心,盡量唔好有碰撞呀。咪以為諾懿出埠係避年,其實佢話自己回港後,都一定會派利是比大家,所以年初八如果大家見到諾懿嘅話,記得同佢逗利是喇﹗

婚後事丨陳自瑤入行以來最性感演出 賴慰玲黎諾懿首合作即挑戰情慾戲

TVB新劇《婚後事》貼地描寫婚姻愛情故事,將於2月26號首播,陳自瑤、羅子溢、賴慰玲、黎諾懿、王敏奕及羅天宇等呢日現身宣傳,故事將以四部曲展現劇中六位主角不同視點所發生嘅愛情故事,佢哋之間更有大量情慾場面。

陳自瑤稱今次係入行以嚟最大膽演出,與羅子溢更有破格演出,羅子溢教佢揀鍾意嘅歌曲播放,佢笑指自己係遮穿崩嘅能手,拍出嚟會有好真嘅感覺;賴慰玲與好友黎諾懿首度合作拍劇,就要拍情慾戲,佢哋笑指互相信任一啲尷尬都冇,諾懿有一場戲更差唔多全裸,賴慰玲讚諾懿盡力令對手唔會走光。

王敏奕同羅天宇多次合作後,終於演變成情侶角色,平日言行斯文嘅天宇,首次挑戰粗獷型角色,事前要做好多心理建設,令王敏奕好期待天宇演出。

 相關推薦

熱門搜尋