不如食豪D丨林迪安係被武指耽誤嘅諧星？女兒林沚羿自稱無乜武打天份

由陸浩明 6號 同名廚 楊尚友Christian 主持嘅《不如食豪D》，1、2號晚播出嘅一連兩集，嘉賓請嚟國際級武術指導兼演員林迪安，同埋佢嘅愛女林沚羿Venus。Christian仲準備咗史上最貴嘅「親子炸雞」(炸雞配魚子醬)，以及「教我如何不咬他之一腳傾城」(烤帝王蟹腳配魚子醬香檳汁)。
林迪安同愛女林沚羿Venus一齊做嘉賓。
林迪安先後為《22世紀殺人網絡》、《蜘蛛俠2》等荷李活大片擔任武指，連帶當時只有 3 歲嘅Venus亦參與《蜘蛛俠2》演出。外表兇神惡煞嘅林迪安，其實係一名非常詼諧嘅慈父，喺搞gag方面更令素有「爛 gag 王」之稱嘅 6 號都甘拜下風。
Venus因為爸爸任武指嘅關係，令佢3歲時有份參演《蜘蛛俠》。
節目入面6號問起佢哋父女互相嘅稱謂時，林迪安一臉認真咁話：「其實Venus叫我，有個專稱日本名『淋巴暢通』，因為佢成日叫我『林爸』，我話淋巴梗係要暢通唔好塞啦。」林迪安金句一浪接一浪，當 Christian教授炸雞秘訣，在於先用大火後再收細，林迪安爆出金句：「『大先』好緊要，我哋年尾咪成日去黃『大仙』還神。」6號呢次不甘示弱即場回贈：「人哋問你啲嘢使唔使、要唔要呀，我話『唔洗』驚污糟。」但薑始終是老嘅辣，林迪安為烤蟹 腳命名為 「教我如何不咬他之一腳傾城」，菜名充滿電影感。此次，6號最終投降認輸，話真係估唔到對方下一句講咩。
外表嚴肅嘅林迪安，其實係一個慈父。
當問到Venus會否傳承父親衣缽當打女？Venus認真咁話：「其實有諗過呢樣，入咗行啲人覺得我好打得，但係由細到大成日探爹哋班，佢亦都試過教我一兩招，但我真係無乜武打天份。」林爸爸表示每趟開戲前都會安排訓練，囡囡差唔多都有參加，但明顯佢冇呢方面天份，雖然係咁，但林爸爸仍為Venus打氣：「阿女放心去做夢啦，老竇會支持你嘅，I love you。」
陳葦璇重提當年去韓國訓練嘅日子。陳葦璇喺網上自家頻道推出《素人家居改造系列》 大受歡迎。
另外，31號播出嘅一集，嘉賓歌手陳葦璇近日喺網上自家頻道推出《素人家居改造系列》 大受歡迎，已拍了逾 20 集。其中一集為一間住了「一人兩貓」嘅公屋進行大翻新，獲網民激讚。

《不如食豪D》逢星期一至五 21:30 J2 82台