狀王之王｜姚子羚肚兜大露背色誘成功 王浩信被逼婚喊住拜堂成人夫

新劇《狀王之王》1 號晚播出嘅一集，姚子羚飾演嘅玲瓏，將會同王浩信飾演嘅宋世傑嚟一場唯美嘅「華麗邂逅」，之後佢哋仲會極速成親！但抱得美人歸嘅宋世傑竟然喊唔停，而逼婚成功嘅玲瓏就豪邁喪笑，相映成趣。另外，「蜘蛛精殺人案」亦會揭開終極謎底。
王浩信喊到鼻涕都出埋。想刀人嘅眼神。
據劇組發布宋世傑同玲瓏「華麗邂逅」劇照，子羚全程以淡妝上陣，原來拍攝當日正值嚴寒，不過為咗唔影響美感，子羚全程「零暖貼」上陣，幸有劇組貼身照顧，令拍攝順利完成，子羚話：「拍嗰日真係好凍，但因為要落水都黐唔到暖包，除咗埋位前著大褸包住保暖，劇組對佢哋好好，book咗暖爐畀我之餘，佢哋放嘅係暖水，所以浸住喺暖水度拍都還可以，唔算好凍。」

呢場戲好似幾香艷。子羚大露背演出。

子羚笑言今次拍攝算係「久違了的大露背」，並透露原來係「長褲」變「短褲」：「場戲我要著住肚兜加短褲仔，原本條褲再長啲，但因為拍咗出嚟覺得冇乜美感，所以即場轉做短褲，等成個身形望出嚟好睇啲。至於大露背嘅戲我其實都好耐冇咁拍過，不過最緊要拍出嚟靚，因為都係講宋世傑模糊間見到個靚女，但佢又唔認得係冇鬚嘅玲瓏。」

《狀王之王》星期一至五 21:30 翡翠台播映