TVB大寶藏丨阿Rain魅力塞爆機場尖沙嘴 廣東話講我愛你答謝愛戴

韓風威力喺2000年初嘅時候有幾勁，睇吓2005年經已貴為韓國天王嘅阿Rain訪港就知，當日阿Rain嘅粉絲經已塞爆機場接機，搞到經理人要安排阿Rain喺特別通道離開，不過點會呃得過現場機靈嘅粉絲，佢哋瘋湧去特別通道守候，雖然只係短短時間見到阿Rain由門口步上車嗰幾秒，但足以叫大家瘋狂尖叫，阿Rain亦有報以微笑。

阿Rain嘅座駕未到酒店，經已有一大批粉絲喺停車場外等候，仲有保安守住停車場門口。當發現守喺酒店無望，佢哋再移師活動舉行地點尖沙嘴，喺活動舉行前兩個半鐘，佢哋將廣東道同海防道交界一段嘅兩條行人路，附近行人天橋企滿晒人。當中更有人早喺活動舉行前十一個鐘，冒雨擺位等偶像，佢哋仲話見到阿Rain會向佢大聲講「我愛你」。

當阿Rain坐住銀色跑車抵達現場時，在場警員竟然擺烏龍截停咗佢架車，點知就引咗在場嘅記者同粉絲衝出馬路影阿Rain，經過一輪控制場面，阿Rain就施施然落車向現場粉絲揮手，雖然全程被追訪，但係阿Rain依然保持笑容，佢仲用廣東話同大家打招呼。對於粉絲嘅熱情同愛戴，阿Rain都非常感激大家，仲以廣東話講出「我愛你 多謝」嚟答謝大家。