歌神許冠傑再踏紅館開騷 預告獻唱黃霑作品做致敬

歌神許冠傑將於三月底再踏紅館開騷，呢日阿Sam現身演唱會記招連唱金曲，令大酊場支持嘅歌迷聽得如痴如醉。阿Sam相隔一年再開演唱會，主打「最緊要好玩」理念，票價依然非常親民，阿Sam都係希望大家可以多啲留港消費。今次呢個Part2演唱會嘅嘉賓陣容豐富，包括有契女梁詠琪、GIGI炎明熹、龍婷，阿Sam仲話平時有留意小Gigi嘅表現，對佢嘅歌聲讚賞有加。

阿Sam嘅歌曲首首經典，一個演唱會真係會唱唔曬。呢次黎到Part2，阿Sam就預告會演唱唔少上次冇唱嘅滄海遺珠作品，亦會演唱一首黃霑喺過去為佢創作，但未被唱過嘅歌向霑叔致敬。

阿Sam喺過去嘅騷都會同兒子們同台演出，呢次都唔例外，佢唔只會同許懷欣、許懷谷合唱，更預告哥哥許冠文同侄女許思維都會現身獻聲。大家亦好關心曾經喺2018自爆患上膀胱癌嘅懷欣最近嘅身體情況，阿Sam亦代阿仔向大家報平安，又分享三父子偶爾會喺Gym房一齊做運動。

演出經驗無數嘅龍婷，呢日現身記招同歌神見面時即刻化身小粉絲，亦分享上次阿Sam演唱會時得獲贈歌神親手送嘅墨鏡。對於呢次可以擔任阿Sam演唱會嗁嘉賓，龍婷都覺得自己好幸運。