狀王之王｜三娘文凱玲自白戲演技爆發 字字鏗鏘鬧盡天下賤男人

新劇《狀王之王》1號晚播出嘅一集，終於解開咗「蜘蛛精殺人案」嘅謎底，經宋世傑（王浩信飾）鍥而不捨追查，終於發現倚春閣地下暗藏密室，仲囚禁咗一大班身負重傷嘅男人。原來倚春閣老闆娘葉三娘（文凱玲飾）係幕後黑手，三娘被宋世傑踢爆後爽快地自首，仲喺公堂上激動自白。貧苦人家出身嘅三娘有著相當悲慘嘅過去，年青時一再受到唔同男人欺壓同蹂躪，因而對男人恨之入骨，而對於其殺死及奪去子孫根嘅男人，三娘全數覺得死有餘辜。最終被判死刑嘅三娘，決定喺獄中上吊自殺了結一生…
文凱玲嘅眼神好有戲。
三娘表面睇嚟係手段兇殘嘅連環殺手，實質為人相當重情，對於真心真意對待自己嘅玲瓏（姚子羚飾），三娘痛錫有加，除咗一直將玲瓏送贈嘅手帕帶喺身上，自首前仲淚眼望向玲瓏；即使佢恨透男人，對於守禮節嘅宋世傑，三娘仍然手下留情，絕對唔係窮凶極惡嘅大奸角。噚晚文凱玲再度演技大爆發，尤其講到「天下男兒皆下賤」、「點解我唔可以糟躓返你哋呀」、「有冇諗過啲死咗嘅男人點解會冇咗下蔭呀？」、「我為咗姊妹幸福，多殺幾個壞男人又何妨」時，咬牙切齒嘅狠樣、輕佻再配以憤怒爆燈嘅眼神，令人完全代入三娘嘅情緒；而為咗突顯三娘自覺無做錯嘅狀態，Connie仲數度流露不屑高傲眼神兼喪心病狂大笑，心寒指數爆燈。除咗自白場口，Connie拎著紅元丹玩弄男受害者時，不但樣子狠毒、額頭仲激動至青筋暴現，足見Connie相當入戲。
文凱玲喺呢場戲演技大爆發。
講到三娘呢個角色，Connie自己都好鍾意，皆因滿足咗佢兩大願望：「三娘雖然只係單元主角，出場時間比較短，但同時滿足咗我想演古裝同埋連環殺手嘅願望。其實我細個開始就鍾意睇古裝劇，第一次主演嘅電影都係古裝。」古裝造型贏盡好評，被讚「宜古宜今」兼「好有味道」，Connie謙虛話：「多謝網民嘅讚賞，今次有三個造型，主要嗰套粉紅色衫劇組好用心，係特別手工訂製。髮型嘅話其實大部份都係我自己真嘅頭髮，唔使戴假髮比較輕鬆。其實拍《狀王》之前我啱啱拍完《一舞傾城》，當時成個頭電攣晒，為咗拍《狀王》又拉返直，好彩啲頭髮仲頂得順。」
展示背脊疤痕。Connie話拍呢場戲準備咗好長時間。
提及喺公堂上展示背脊疤痕嘅一幕，由於疤痕佔據位置頗多，Connie坦言準備時間頗長，仲話拍攝展示疤痕場口難度極高：「當日提早咗好多去現場整背脊嘅疤痕，拍嗰陣因為手上有鐵鏈，加上古裝衫嘅扣好難解開，大家都要一齊研究咗一陣，先成功配合做到一氣呵成拉開件囚衣嘅鏡頭。」至於拍《狀王》另一難度，Connie就話係忍笑：「最難係大家好搞笑嘅時候，我唔可以笑，仲要特別正經。例如宋世傑同阿九扮女人時，我要演睇唔出、好認真咁覺得佢哋好可憐。」

《狀王之王》星期一至五 21:30 翡翠台

金剛同王浩信反串扮女人，令文凱玲好難忍笑。