柳俊江離世丨柳爺家人感激各界關懷 寄語短暫一生是苦往後他方是甜

於上月5號離世、終年42歲嘅柳俊江，其家人喺上月30號於沙田寶福紀念館為佢設靈，柳爺生前好友伍家謙同彭秀慧等協助家屬安排到嚟致祭友人，而柳爺生前女友Grace，以及前妻雷康怡與一對仔女都送別最後一程，翌日完成大殮儀式後，柳爺靈柩即奉移富山火葬場火化。

喺2月2號，柳爺嘅家人及好友聯名，喺柳爺生前社交平台上載一張柳爺喺海邊跑步嘅相，然後寫上「柳俊江先生告別禮順利完成，衷心感謝各界朋友出席以及關懷慰問，也感謝傳媒朋友的包容體諒，給予空間讓我們平靜處理一切。柳爺常以「先苦後甜」比喻跑步，但願柳爺跑過短暫的一生是苦，往後他方的一切一切，都是甜。柳爺留下的一切，將會是我們努力向前的動力。每人各有一片天空，各有自己跑道，願大家好好生活，繼續發掘內心未知的強大，繼續為目標進發。祝福大家。」短短一小時，經已超過一萬三千人點讚給予鼓勵慰問。