中年好聲音2丨古淖文唱錯粒字緊張眼皮跳　王玥造型掀陳慧嫻昔日回憶

歌唱選秀節目《中年好聲音2》嚟緊4號晚將會播出第九部曲《陳慧嫻金曲賽 喜氣洋洋賀十二強！》，呢個回合嘅賽制係14強選手輪流獻唱天后陳慧嫻嘅經典金曲，14強選手演唱完畢後，留喺危險區嘅最低分兩位中二生將會被淘汰！呢集出場名單如下：《戀戀風塵》古淖文、《飄雪》陳蒨葶、《人生何處不相逢》劉可、《去吧！》鄭梓浩、《逝去的諾言》王玥、《我心不死》顏米羔、《情意結》陳俞霏和《紅茶館》林若盈。
今次嚟個陳慧嫻金曲專場！
選手獻唱陳慧嫻金曲，而同時係擔任評審嘅本尊慧嫻細述每首金曲背後鮮為人知嘅故事，當中由廣播劇誕生嘅《我心不死》故事最為特別，慧嫻話：「當時電台搵人去作呢首歌，再搵Wyman（黃偉文）填詞，Wyman喺日本填歌詞時咁啱遇到地震，呢個地震引發到佢寫出天崩又地裂、點樣去求生嘅歌詞！」14強選手嘅出場次序根據本尊陳慧嫻心水決定，首位出場嘅係古淖文，佢獻唱慧嫻第一次回歸樂壇嘅歌曲《戀戀風塵》，演出完畢後，古淖文被婉婉指緊張到眼皮跳。對於淖文演出，慧嫻覺得：「呢首歌係好難唱，情感要由低去到高，好似過山車咁，今日你做得好好，我覺得你個Phrasing做得好過我。」細心聆聽嘅慧嫻仲踢爆淖文唱錯一隻字歌詞。
古淖文被爆唱錯一粒歌詞。
造型方面則以王玥最為搶Fo，戴上白帽、穿上白色長裙嘅佢，甚有心思以慧嫻昔日經典造型上陣，令慧嫻為之感動：「多謝你呀，呢個係80年代陳慧嫻Look。」王玥獻唱慧嫻人生首支單曲《逝去的諾言》，可惜未能駕馭低音部分，慧嫻話「你低音出唔到嚟，係咪有啲緊張，喉嚨好似勒住咗。」伍仲衡講到：「其實女仔歌嚟講呢個Key唔係好低，可能低音唔係你強項，咁你應該將隻歌升番Key，甚至乎揀過另一隻歌！」甜姐兒林若盈獻唱《紅茶館》，若盈甜美嘅歌聲滲出暗戀感覺，但到歌曲經典獨白部分時就出事，慧嫻笑指：「你嘅鬼馬係做到嘅，奀皮都有啲，略嫌你講嘢嗰度粗魯咗少少，真係有啲驚，應該嗲番啲，我可能不受溝！」肥媽就話：「依家啲女仔冇咁含蓄，一嚟就『喂，去唔去街呀？』，我哋唔明㗎喇！」

《中年好聲音2》星期日 20:30 翡翠台
王玥嘅造型超搶Fo。劉可。