帶貨女王陳自瑤擁專屬頻道 龍年寄望較多幕前演出

帶貨女王陳自瑤擁專屬頻道 龍年寄望較多幕前演出

近年主攻直播帶貨,創出驕人成績嘅直播帶貨女王陳自瑤,再次出動向網民推介抵買嘅賀年食品,Yoyo亦專登著到一身紅噹噹配合過年氣氛,而今次係Yoyo嘅個人專場頻道,所以當中嘅產品都係佢從芸芸嘅產品名單中細心試過用過,再精心挑選出嚟,佢話今次有好多抵買嘅賀年食品,又有適合團年飯嘅套餐,只係幾百蚊就可以喺屋企享用。

下個禮拜就已經踏入年初一,不過Yoyo就話自己忙到都未辦年貨,因為早前有段時間唔喺香港,到最近啱啱先返嚟,跟住就一直忙工作,佢話自己未換錢封利是,又未買揮春同年花,連過年嘅食品都未準備。

Yoyo舊年喺直播帶貨市場帶嚟名利雙收,講到新一年,佢都希望再作多方面發展,除咗新嘗試之外,亦希望多啲參與綜藝節目或者拍劇,平衡返時間喺幕前同觀眾見面。

婚後事丨陳自瑤入行以來最性感演出 賴慰玲黎諾懿首合作即挑戰情慾戲

TVB新劇《婚後事》貼地描寫婚姻愛情故事,將於2月26號首播,陳自瑤、羅子溢、賴慰玲、黎諾懿、王敏奕及羅天宇等呢日現身宣傳,故事將以四部曲展現劇中六位主角不同視點所發生嘅愛情故事,佢哋之間更有大量情慾場面。

陳自瑤稱今次係入行以嚟最大膽演出,與羅子溢更有破格演出,羅子溢教佢揀鍾意嘅歌曲播放,佢笑指自己係遮穿崩嘅能手,拍出嚟會有好真嘅感覺;賴慰玲與好友黎諾懿首度合作拍劇,就要拍情慾戲,佢哋笑指互相信任一啲尷尬都冇,諾懿有一場戲更差唔多全裸,賴慰玲讚諾懿盡力令對手唔會走光。

王敏奕同羅天宇多次合作後,終於演變成情侶角色,平日言行斯文嘅天宇,首次挑戰粗獷型角色,事前要做好多心理建設,令王敏奕好期待天宇演出。

 相關推薦

熱門搜尋