吳業坤突襲唱片店買新專輯 約定麥明詩結婚唱原來她不夠愛我

吳業坤近期重投歌唱發展，先後推出新作同開騷，近日坤哥相隔五年再推出新專輯，襯住專輯大賣之際，坤哥就突襲唱片店親自視察銷情，連媽咪都有嚟支持。嚟得唱片店，坤哥當然按傳統買番自己隻碟取個好意頭，佢亦有買多啲當作禮物送畀朋友留念。佢都話今次係嘔心瀝血去製作，所以見到實體碟都有啲感動到想喊。

今次專輯封面加插日文元素同特別圖案，坤哥話今次嘅概念係源自佢想以日本文化「匠人」做主題，所以今次專輯同日前個騷都係呢個概念，而碟面有一個人喺度揼石仔，係佢都想自己可以慢慢揼石仔，等大家睇住佢嘅成長，而碟面嘅日文字句，坤哥當然係向太太請教，內容恴思係未來仲會有咩發生呢，究竟佢能唔能夠信守承諾去成為一個匠人。

對於好友麥明詩日前公開自己向男友盛勁為求婚片段，坤哥就有啲疑問，究竟麥明詩係求婚定被求婚呢？佢話有恭喜對方，希望對方會派帖畀佢去飲，不過自己之前就冇派帖畀對方，佢仲自爆話之前講笑講過，如果麥明詩結婚，佢就上台獻唱《原來她不夠愛我》，坤哥話若果真係收到帖嘅話，當日會拖住盛勁為上台唱呢首歌。