本尊就位丨孔德賢謝東閔雙雙跌落井 落水吊威吔自嘲似炸物

由孔德賢同謝東閔主演嘅民初喜劇《本尊就位》，假道士遇上真神仙嘅故事產生唔少笑料同奇幻嘅經歷，私下兩位男主拍攝嘅體驗都相當刺激﹐呢集輪到佢哋雙雙跌落井嘅穚段，需要濕身吊威吔﹐孔德賢雖然參加過綜藝《不可能任務》嘅動作演員特訓，但係原來佢係第一次拍劇吊威吔，中間更有兩人背對背爬上井嘅驚險場口，Danny仲以煮食論嚟形容呢次嘅動作戲份:「今日真係我哋好似煮嘢食炸完啲嘢咁，(我哋好似炸物咁) 一下抽上嚟，滴住水飛出嚟！」

為咗應付呢次濕身吊威吔戲份，Danny早就用防凍神器「保鮮紙」包實全身，不過呢次唔算係最驚險嘅場口，佢透露有一場吊威吔撞牆戲份，對從不玩機動遊戲嘅佢，簡真有種震憾嘅感覺，特別係工作人員事前零預警。

而飾演真神仙嘅謝東閔透露拍呢套劇成日要吊威吔應付飛來飛去嘅場口，而吊威吔落水佢都係第一次。