本尊就位丨孔德賢謝東閔雙雙跌落井 落水吊威吔自嘲似炸物

本尊就位丨孔德賢謝東閔雙雙跌落井 落水吊威吔自嘲似炸物

由孔德賢同謝東閔主演嘅民初喜劇《本尊就位》,假道士遇上真神仙嘅故事產生唔少笑料同奇幻嘅經歷,私下兩位男主拍攝嘅體驗都相當刺激﹐呢集輪到佢哋雙雙跌落井嘅穚段,需要濕身吊威吔﹐孔德賢雖然參加過綜藝《不可能任務》嘅動作演員特訓,但係原來佢係第一次拍劇吊威吔,中間更有兩人背對背爬上井嘅驚險場口,Danny仲以煮食論嚟形容呢次嘅動作戲份:「今日真係我哋好似煮嘢食炸完啲嘢咁,(我哋好似炸物咁) 一下抽上嚟,滴住水飛出嚟!」

為咗應付呢次濕身吊威吔戲份,Danny早就用防凍神器「保鮮紙」包實全身,不過呢次唔算係最驚險嘅場口,佢透露有一場吊威吔撞牆戲份,對從不玩機動遊戲嘅佢,簡真有種震憾嘅感覺,特別係工作人員事前零預警。

而飾演真神仙嘅謝東閔透露拍呢套劇成日要吊威吔應付飛來飛去嘅場口,而吊威吔落水佢都係第一次。

本尊就位|結局篇解構髮簪的秘密 樊亦敏自創古早Flower手勢掀話題

喜劇《本尊就位》今個星期進入結局篇,隨住 謝東閔 發現陳嘉慧性情大變,而且突然身手了得,令觀眾有所揣測,呢日一眾演員謝東閔、 孔德賢 樊亦敏 黎燕珊 等就現身宣傳活動,解構「髮簪的秘密」,Danny話支髮簪好特別,唔止促成東閔同Erica結緣,最後仲係成個鎮可以變返平安嘅關鍵。Danny劇透最後幾集有好多特效、動作場面同埋高潮位,仲搞笑話劇集其實唔係古早味,而係Marvel味。

Amy喺劇中因為生動演繹角色何仙,而被網民封為「糊塗版多啦A夢」,而佢自創嘅古早FLOWER手勢令成件事更加突出,Amy話估唔到大家咁鍾意,最緊要開心同帶俾大家歡笑。Amy同珊姐更一致認同韋家雄係全劇最好笑,珊姐大讚韋家雄好犀利:「我曾經問過佢你攰唔攰,係咁講嘢。」Amy再加碼爆料:「佢乜嘢都可以講一餐懵,但自己嘅台詞又講唔好。」仲搞笑話如果要拍慘情戲,直情想殺咗韋家雄添。
而受到村內穿山甲妖作亂嘅影响,珊姐將會化身殭屍橫行,珊姐話入行40年第一次扮殭屍,好大挑戰好好玩,而劇情需要佢仲要食魚膠粉整成嘅啫喱豬肝,更令佢深刻又難忘。

 相關推薦

熱門搜尋