家燕姐全家總動員封利是派喜氣 新年戒口修身登台性感衫被禁

早前同馬來西亞國寶級天后 茜拉 推出賀年歌嘅 薛家燕，喜慶賀年氣氛滿瀉嘅歌曲大受歡迎，網上點擊率早已破百萬。而其中祝福大家想乜都有嘅「有有舞」亦掀起熱潮，仲連家燕姐年僅2歲半嘅孫仔亦學嫲嫲跟住跳。

呢日家燕姐現身一個賀年活動，更為推廣「有有舞」現場舉辦跳舞比賽，十強喺台上渾身解數搏家燕姐「點燈」，有人做一字馬、有人派心心，勝出者更獲得大年初八喺澳門舉行嘅《金龍迎福新春演唱會》門票。

家燕姐呢日為一班跳有有舞嘅參賽者打氣同任評判

家燕姐大讚參賽者表現落力，最後皆大歡喜齊齊獲佢送贈演唱會門票，佢又親自向途人派福袋。近日忙於為新春群星演唱會綵排嘅佢，又提到有小妹妹同婆婆齊齊參加比賽：「佢真係同我孫仔一樣好有天份，我孫仔睇咗幾次《有有有》就識跳，我已經約定新抱，等佢三歲就嚟家燕媽媽藝術中心，等啲老師好好栽培佢。」

新年將舉行演唱會嘅佢，指傳統一定要跟足，利是亦會狂派

今年農曆新年家燕姐工作不斷，未能同家人外遊，雖然未能放假，不過家燕姐就話過年功夫一樣要做足，團年飯會同家人共聚，仲要狂封利是：「今年要乜都有，所以利是呢啲梗係要有，我已經準備好晒，個個都話收咗我利是全年都好運。以往封利是要兩個工人幫手，今年應該要成家人齊齊封。我好樂意將啲福氣分享畀大家，總之人人開心，家燕姐就開心。」

佢仲話希望將福氣同大家分享呀

家燕姐又笑言唔敢叫孫仔幫手：「我驚佢封完自己拎埋，佢最叻就係恭喜發財𢭃利是。」至於年初八舉行嘅新春群星演唱會，家燕姐仲爆原本有性感造型：「都開到好低㗎，不過我個女話太性感，我咪叫設計師幫我拉返高啲。我無咩所謂，呢個年紀都着到，大家又睇得開心就得，不過阿女就話唔好。」近日正努力修身嘅佢，今年唔止要忍口準備，要封嘴唔食年糕更要戒飯：「我覺得會瘦到，到時等大家見到肥家燕，唔係，係靚家燕先啱。」