鄭啟泰猝逝|中聲家族錄影中收噩耗 肥媽聞鄭啟泰死訊嘆生命無常

鄭啟泰猝逝|中聲家族錄影中收噩耗 肥媽聞鄭啟泰死訊嘆生命無常

3號晚突然離世嘅 鄭啟泰 一直為兩季嘅《中年好聲音》擔任旁白工作,佢亦不時到錄影拍攝現場探班,喺節目錄影中途鄭啟泰猝逝嘅消息傳出,台前幕後人員都感到相當愕然,四位長駐評審 周國豐 肥媽 伍仲衡 張佳添 更難以消化呢個壞消息。

肥媽更直指日前先與對方見面:「仲記得一個星期前先同嚟探班嘅鄭啟泰開心合照,好突然完全冇心理準備,太過Shocking,人生真係無常,到而家都未接受到,消化唔到。」

張佳添更分享同鄭啟泰嘅淵源,佢哋相識於當年亞洲電視節目《星光大道》,當年佢亦同樣為節目錄製旁白,到近年兩季嘅《中年好聲音》,真係相識多年。添Sir亦因為居所就近新城電台,不時會遇上返工嘅鄭啟泰。老友走得突然,佢感覺對方仍在,希望佢喺天上感受到大家對佢嘅愛。而伍仲衡亦記得1月自己嘅婚禮時,鄭啟泰亦係坐上客之一:「佢好開心同我地暢飲,突然之間咁樣,之前從冇聽過佢身體有唔舒服。」

鄭啟泰猝逝|即將再婚踏入人生新階段 未婚妻崩潰狂發限動追憶

56歲嘅 鄭啟泰 3號下午離世,終年56歲。上星期先宣佈會巢新城電台開咪,同時又公佈即將與同居女友 王雁芝 再婚嘅佢,重返電台當日滿臉春風,而身為港隊速度滾軸溜冰前代表嘅Angie,事發後曾回應傳媒指對事件難以接受。

近日正研究婚禮細節嘅佢哋,突然間天人永隔,而Angie面對未婚夫離世亦難掩埋場哀痛,整晚連發十多個限時動態追憶愛人,令人婉惜。

 相關推薦

熱門搜尋