TWINS演唱會粉絲專場 阿Sa阿嬌唱新歌唱到淚崩

TWINS紅館演唱會星期六晚舉行到第11場，亦係為歌迷特設專場，阿Sa(蔡卓妍)同阿嬌(鍾欣潼)更特別為歌迷Encore多4首歌，又選唱為歌迷而寫嘅新歌《忠粉》 ，因為歌迷太熱情令佢地未開口唱已經落淚。

佢哋淚流滿面咁唱完新歌後，即攞紙巾不停抹淚，又不約而同話 : 「 太感動啦！真係。要平靜下先....」 歌迷就狂叫佢哋唔好喊。平靜返之後，著到公主咁嘅TWINS，又重返平日嘅瘋癲本色，突然唱「冇咗你哋我哋會死！ABCDEFG FANS FANS 我哋支持你！」

TWINS又不敵全場萬人齊聲大叫「嘴」，兩人搞笑跳出功夫一樣嘅舞步，之後阿Sa拉阿嬌埋身欲嘴，但係第一下竟然係失手相撞令全場笑爆，到第二次嘗試先完美錫錫，歌迷叫聲亦嗌裂整個紅館。

呢晚Encore部分TWINS換上新歌衫，萬人K歌大合唱經典歌之後，每晚都為觀眾評分嘅阿嬌就俾出500分！之後歌迷瘋狂點歌，最後兩人Encore唱足五首 : 《大浪漫主義》、《百試不厭》、《士多啤梨蘋果橙》、《大紫大紅》同《死性不改》，再以《風箏與風》作結而呢晚 何超雲、何超蓮仲有張達明亦有來到場支持。