鄭啟泰猝逝|鄭啟泰參與多部劇集演出 《新聞女王》霸氣惡鬥Man姐

鄭啟泰猝逝|鄭啟泰參與多部劇集演出 《新聞女王》霸氣惡鬥Man姐

資深DJ 鄭啟泰 星期六突然離世,終年56歲,生前鄭啟泰工作範疇多多,除咗係著名電台主持,亦曾主持唔少電視節目,近年又不時參與劇集演出。鄭啟泰喺廣播界服務逾30年,當年佢自加拿大升學後返港,就自薦加入商台,由顏聯武合作主持節目《一切從音樂開始》。

另外佢又曾同前妻黎海珊、邵國華合作主持《開心看天下》等節目,之後鄭啟泰喺1999年轉投新城電台,曾擔任新城娛樂台嘅執行監製同主持,著名節目包括《開心大鬧鐘》、《生活好國度》等。直至去年10月,佢以緣分完結為由辭任﹐至上月底佢受新上任嘅首席營運總監馬浚偉邀請回歸主持節目。

鄭啟泰早喺1995年開始涉足電視節目主持同廣告旁白工作,曾經加入亞洲電視為節目擔任報幕和旁白,以及藝員訓練班導師。佢亦多次為大型頒獎禮擔主持和現場報幕員,其中為去年嘅亞洲電影大獎紅地氈環節擔任司儀,以及多屆香港電影金像獎擔任即時報幕。

近年鄭啟泰亦有唔少演出劇集嘅機會,經常飾演高學歷嘅專業人士或學者,好似近日熱播嘅《新聞女王》中,佢飾演嘅盧博士成為劇集開首嘅巴士翻側案嘅重要角色,首集一出場時已同佘詩曼飾演嘅Man姐唇槍舌劍,氣場不輸新聞女王。

佢並曾演出《愛.回家之開心速遞》、《逆天奇案》、《雙生陌生人》、《美麗戰場》、《超能使者》、《隱門》、《飛常日誌》、《疊影狙擊》等。正播出嘅劇集《本尊就位》亦有鄭啟泰身影,而剛煞科嘅《反黑英雄》佢都有份演出。

而喺台慶劇《疊影狙擊》中,飾演新加坡警官嘅鄭啟泰,巧合同日前剛離世嘅 河國榮 (飾演驗屍官)喺停屍間有一場對手戲,同場戲份兩人相差一日先後離世,令人倍覺傷感。

鄭啟泰猝逝|中聲家族錄影中收噩耗 肥媽聞鄭啟泰死訊嘆生命無常

3號晚突然離世嘅 鄭啟泰 一直為兩季嘅《中年好聲音》擔任旁白工作,佢亦不時到錄影拍攝現場探班,喺節目錄影中途鄭啟泰猝逝嘅消息傳出,台前幕後人員都感到相當愕然,四位長駐評審 周國豐 肥媽 伍仲衡 張佳添 更難以消化呢個壞消息。

肥媽更直指日前先與對方見面:「仲記得一個星期前先同嚟探班嘅鄭啟泰開心合照,好突然完全冇心理準備,太過Shocking,人生真係無常,到而家都未接受到,消化唔到。」

張佳添更分享同鄭啟泰嘅淵源,佢哋相識於當年亞洲電視節目《星光大道》,當年佢亦同樣為節目錄製旁白,到近年兩季嘅《中年好聲音》,真係相識多年。添Sir亦因為居所就近新城電台,不時會遇上返工嘅鄭啟泰。老友走得突然,佢感覺對方仍在,希望佢喺天上感受到大家對佢嘅愛。而伍仲衡亦記得1月自己嘅婚禮時,鄭啟泰亦係坐上客之一:「佢好開心同我地暢飲,突然之間咁樣,之前從冇聽過佢身體有唔舒服。」

 相關推薦

熱門搜尋