請追夢伯伯演出新歌MV 陳柏宇與百歲騎士傾唔完

Jason陳柏宇 一向都有陳伯呢個花名，早前佢遠赴台灣為新歌拍攝MV，就真係搵咗3位伯伯做MV男主角。為符合歌曲「無論幾多歲都可以追夢」嘅理念，所以MV就以三位伯伯聽到歌曲後決定相約揸住電單車踏上環島之旅而展開故事。

而鐵騎老人環島遊真有其事，其中一位主角就係MV男主角之一嘅百歲老人郭深森伯伯。Jason同郭伯伯相當好傾，又請郭伯伯教佢講台語，又要佢分享鐵騎遊樂趣，兩人甚投契唔覺有年齡差。郭伯伯分享騎電單車令佢感受到無比嘅快樂係長壽嘅要素:「很開心，每天騎機車遊山玩水心情很開心，所以才活到100歲，老人家可以騎機車就很開心。」 Jason亦好佩服郭伯伯，Jason話:「環島遊需要好多體力，仲要揸電單車，證明佢好有活力仲好精靈。」