鄭啟泰猝逝|胞妹與未婚妻醫院了解後續 需剖屍驗死因後事年後舉行

鄭啟泰猝逝|胞妹與未婚妻醫院了解後續 需剖屍驗死因後事年後舉行

資深DJ 鄭啟泰 星期六突然離世,佢嘅胞妹Fiona同未婚妻 王雁芝(Angie) 星期一到醫院同醫生會面,經初步了解鄭啟泰死因需要剖屍詳細檢驗再確定。

Fiona指出家人非常感謝外界嘅關心,不過同時希望大家對死因莫作過多揣測。而家人亦祝未入門嘅Angie為家人,而父母目前心情尚可,鄭啟泰嘅朋友同舊同學亦紛紛送上關心。

Angie呢日一直堅強正面,佢確認事發時鄭啟泰有雕肚屙同抽筋情況出現,又指過往未婚夫身體冇特別不適,希望各界同朋友都記住Eric生前樂觀同搞怪性格。佢又提到同Eric原定打算Keep Fit拍攝婚紗靚相,可惜突然就天人永隔,不過會繼續保持Eric嘅正面樂觀態度,更指過往相處係一生中最快樂時間。

Fiona指出哥哥生前古怪搞笑,故喪禮亦會秉持佢一直以來嘅性格,不過由於需驗屍等程序,所以後事將會於農曆年過後再進行。

王雁芝以短片紀念未婚夫鄭啟泰 盼下輩子繼續談戀愛

鄭啟泰於本月3號突然離世,終年56歲。13號係鄭啟泰嘅生忌,加上第二日又係情人節,佢嘅未婚妻王雁芝Angie就連續兩日喺社交平台發文悼念對方。

先係喺情人節當日上載多張二人嘅甜蜜合照,並喺帖文上寫道:「生日快樂鄭啟泰❤️愛要及時!好老土,但係我地就真係好明白,我們兩位都比較直接,他已經求婚了,我相信我們都沒有遺憾吧!曾經他問我是否真的很愛他,我說是,他就說他嘗試克服結婚的恐懼,我們結婚吧!雖然我們年齡有點距離,但是我們相處下來是非常非常舒服的。我們簡直就是生活在自己世界裡。這兩年是我最快樂的兩年,認識你是我最大的福氣,不管其他人怎麼說,你我都知道我們是最合適的❤️❤️永遠愛你❤️❤️」

而喺15號,Angie再將佢同鄭啟泰二人嘅生活片段,合輯成一條影片上載到佢嘅社交平台,並喺帖文上表示:「送給您的最後一份情人節禮物。我們下輩子繼續談戀愛吧❤️🌸我答應您我會好好活着。」並加上「請把它看完」嘅hashtag,原來片尾正正係當日鄭啟泰向Angie求婚嘅片段,唔少網民睇完都話好感動。

 相關推薦

熱門搜尋