中年好聲音2｜挑戰陳慧嫻金曲 顏米羔越唱越強 劉可失準被批三不像跌落危險區

車婉婉主持嘅歌唱真人騷《中年好聲音2》喺4號星期日晚播出第九部曲《陳慧嫻金曲賽 喜氣洋洋賀十二強！》，選手們精挑細選慧孄金曲作賽，唱出另一番韻味，獲評審肥媽(Maria Cordero)、伍仲衡、張佳添、周國豐和陳慧嫻不同品評。

「大魔王」劉可獻唱《人生何處不相逢》送給天上亡父，可惜未能承接上一集氣勢，表現失色。慧嫻直言感失望：「唔明點解你要揀呢隻歌，呢隻歌係小調，唔Expect你用現代嘅方法去唱，你又重新編曲，令到隻歌唔知變咗乜鬼嘢。」肥媽都有同感：「你好想表達好多嘢，但你依家諗多咗，唔知自己想點，有啲三不像，拉低自己分數好唔抵。」最終劉可僅獲79分，與同獲79分的陳蒨葶和獲75分的王玥齊齊跌入危險區。

劉可呢集為紀念亡父而演出，可惜效果未如理想

 劉可接受製作組訪問時解釋選歌背後嘅感人故事，透露亡父是一位軍人，性格硬朗又嚴肅，在爸爸身上學會凡事要盡力做好，堅持到最後。可惜鐵人也有倒下時，劉爸爸最終不幸因癌症離世：「去到中後期佢成個人瘦晒，唔可以正常地排便，佢自己都好煩躁，覺得拖累到屋企人，嗰段時間困擾咗成2年。」最後劉可哽咽說：「我同佢今生緣分雖然結束咗，但喺來世某一日某一個時間，我期待同佢再相遇。」

劉可指曾為軍人嘅爸爸癌症離世

另一亮眼選手顏米羔則獻唱《我心不死》保持出色發揮，獲得全晚最高分93分，更獲車婉婉大讚：「我要畀個新名你，遇強越強顏米羔！」慧嫻激讚米羔揀啱歌：「呢隻歌最緊要係講故仔，你嗰種頑強鬥志同埋感情，我覺得你做得好到位，你比原唱做得更好！」肥媽則說：「你一開口唱，我就話呢件嘢偷咗隻歌，唱到好似夏韶聲嗰種Style。」

顏米羔呢集則得到93分高分，表現更獲盛讚

而獻唱《情意結》嘅陳俞霏坦言希望挑戰抒情歌：「一路比賽以嚟好似伍仲衡老師話齋，好Technique、好嗌，呢首歌可以好好去抒發感情，所以想嘗試吓。」各位評審都睇得好投入，最終俞霏獲得85分唔錯嘅成績，連慧嫻都大讚唱得好好。

陳俞霏亦都以不俗演出獲得85分

《中年好聲音2》逢星日晚 20:30 翡翠台