愛回家拉大隊北上拜早年粉絲迫爆現場 送禮熱情應援

處境劇《愛．回家之開心速遞》嘅演員 劉丹、 呂慧儀 湯盈盈 滕麗名 樊亦敏 周嘉洛 等呢日拉大隊到深圳出席新春喜樂會，同內地粉絲提早慶祝農曆新年，北上有咁多美食，第一站佢哋梗係先去醫肚啦。之後大夥就浩浩蕩蕩去到會場，有唔少愛回家嘅忠粉一早霸定位迎接偶像，佢哋除咗準備應援物之外，有唔少人更向演員們送花以及手繪畫，大家都表現得好熱情。

演員們紛紛手執小禮物感謝大家，呂慧儀話最初收到通知場地或會大風可能會凍，點知喺現場見到咁墟冚，即刻覺得好溫暖仲出晒汗。周嘉洛就被現場氣氛震懾，好多謝粉絲對佢哋嘅愛戴，樊亦敏見到咁熱鬧嘅場面都想再繼續去唔同地方同大家見面呀。

一場嚟到又點少得玩遊戲同一展歌喉呢，愛回家嘅大家庭仲為觀眾獻唱喜氣洋洋嘅賀年歌，氹得粉絲們不知幾開心。除此之外，原來深圳都係一班演員嘅熱門好去處，樊亦敏閒時會同友人一齊北上覓食，古佩玲都會到深圳扮靚，而喺嚟緊嘅農曆新年，呂慧儀就希望同親友到深圳吃喝遊玩，滕麗名就會旅行過年喇。