TWINS即興拉關智斌上台 連打三個側手翻焫㷫全場

唔經唔覺TWINS嘅紅館演唱會已經嚟到第12場，亦係粉絲專場最後一場，所以孖女情緒相當興奮，咁啱呢晚好友 關智斌 都係座上客，當孖女唱緊《LaLa世界》時TWINS就一時興起拉埋Kenny上台一齊玩，略帶醉意嘅Kenny仲應經理人Mani要求一展好身手，連打三個單手側手翻，令全場High爆！

之後Kenny仲講笑問：「我算唔算係TWINS第一位表演嘉賓，有冇咩待遇？我想要轉上台嗰種。」接住Kenny就好自High咁自己扮升上台嘅動作，引得全場爆笑拍爛手掌。之後Kenny同TWINS合體嚟個攬攬，更展開妙語連珠對話，Kenny首先表示自己飲咗少少酒好醉，而且仲喺台下同TWINS飲勝。阿Sa(蔡卓妍)聽完就笑笑口話：「我唔飲得時你先嚟同我飲勝，平時我飲你就唔飲。」Kenny就抵死回答：「我係咁《死性不改》架，你哋係唔係呀？」硬Tag合唱呢首名曲，令粉絲回憶返晒嚟。