你好，打劫！｜尾場出品人華仔現身齊謝幕 為升斗市民舒百物騰貴烏氣

張達明 執導 楊偉倫 麥沛東 魯文傑 巢嘉倫 蔡頌思 黎逸正 等參與演出嘅舞台劇《你好，打劫﹗》6場演出，星期日晚上演最後一場，台下觀眾反應熱烈，整晚歡呼聲不斷，而出品人 劉德華 亦特別現身支持，謝幕時又同導演達明，仲有幾位演員加上監製 鄧永威 一齊謝幕，齊齊向觀眾鞠躬致謝，華仔大讚演員們落力演出，更指作品好評如潮，期待再度重演。

華仔於演出尾場現身同一眾演員慶祝

《你好，打劫﹗》門票一開賣就極速售罄，六場全部爆滿，正式公演之後亦大獲好評。呢部黑色喜劇借一宗劫案，反映基層生活掙扎，箇中情節有笑有淚。阿卵同麥東加上全體演員演出精彩。

呢場謝幕，導演達明亦邀請華仔上台，華仔更即場要求麥東重演其中一幕高潮戲，讀出基層市民生活中面對的種種費用，麥東即氣定神閒一口氣讀出近五十種生活費用，仲有近來令唔少市民都困擾嘅垃圾徵費：「管理費水費電費煤氣費冷氣費生活費，行政費交通費電話費，電話行政費數據費....」令全場拍爛手掌。華仔、達明最後帶領演員一齊鞠躬致謝長達兩分鐘，感謝觀眾熱烈支持。

佢仲即席要求麥東再一次重演其中一幕精彩場面

華仔接受訪問時，就指劇團疫情期間遇到唔少困難，今次喺監製同導演帶領之下，完成一套令觀眾開懷嘅作品：「我希望帶畀大家，關於我哋身邊多啲嘅事，多啲情況嘅作品，畀大家真係喺生活上雖然面對咁多壓力，都可以透過個呢個劇得到少少解放。」

主演阿卵同麥東亦稱今次無論劇本，以至台前幕後都非常用心，希望演出為觀眾帶來反思，作為導演嘅達明最開心當然係見到觀眾嘅熱烈反應：「好開心聽到觀眾嘅掌聲，阿華哥坐喺我附近，我聽到佢畀到好多掌聲，真係睇得好投入睇得好開心。」至於有份客串外賣員嘅監製Amic，被問到日後重演時會否安排華仔演出？華仔聞言即笑說自薦參與外賣仔一角。