狀王之王丨陳禎怡首演古裝喜劇 劇中造型令姚子羚打翻醋埕

首次演古裝喜劇嘅陳楨怡Celina，喺5號晚播出嘅《狀王之王》首度登場，佢嘅出現令飾演宋世傑太太玲瓏嘅姚子羚連環打翻醋埕，呢晚播出嘅一集，玲瓏出手遮掩對方嘅胸部確保宋世傑「非禮勿視」一幕，配以 Celina 嘅詫異眼神，效果相當爆笑。
呢幕相當惹笑。
講到劇中造型，Celina指洋裝同古裝均各有特別，但令佢最難忘嘅係經常要隨身攜帶嘅藥箱：「以前啲藥箱原來成個用實木做，比較重，拍嘅時候可以順便練吓手臂力。」

Celina指藥箱係用實木做嘅關係，所以比較重。

Celina又透露為 咗演得更加神似，唔只事前做足功課，佢仲睇咗人生第一次嘅中醫：「我去咗橫店中醫館度睇我人生第一次中醫，仲試埋針灸，我之前未試過，因為本身驚針。但因為我拍劇都有施針嘅場面，所以主要要體驗吓個流程。另外我都有睇啲關於仵作嘅劇，去學吓啲揸刀手勢同埋點樣處理啲解剖工具。」

為咗演好呢個角色，Celina特登睇好多關於仵作嘅劇。

除咗要學手勢，Celina坦言仲要背大量資料：「我劇入面有間中醫館，裏面有個百子櫃。拍之前我有去個中醫館度熟習環境，去記吓啲中藥擺喺邊，因為拍嗰時我要非常熟個櫃。另外我都要花時間記啲中藥名，有啲真係好長。」
Celina 花咗好長時間去記啲中藥名。
對於首次同姚子羚合作，Celina話初次同對方見面時有啲害羞，幸好子羚平易近人：「佢好warm，我第一次見到佢已畀佢融化，當時我好怕醜，好想 say hi 但又唔敢，Elaine(子羚)已經好熱情。大家相處咗三個月，Elaine同子涵真係好似大姐姐咁好照顧我，好有家嘅感覺。」
導演林子聰都讚Celina好學又可愛。

而導演林子聰都讚Celina好學又可愛，對此Celina表示：「呢套劇拍攝氛圍真係好好，每日都好開心，好期待開工之餘又會笑住咁收工，成日都笑到肚痛，所以最難係忍笑。我哋就算唔使拍都會去探班，因為齋睇都已經好開心。」講到最難忘一幕，佢透露係針灸場口，皆因佢多次幾乎誤拮姚子羚：「因為速度要求好快，但拍嗰個角度又好難睇清楚施針個位，所以好多Take 都爭啲針咗落子羚度，我自己都拍到滿頭大汗。」

《狀王之王》逢星期一至五 21:30 翡翠台