網紅甜卡｜黎紀君訪維也納百年咖啡店 廖慧儀作客「無菜單」溫情餐廳

結合「甜品」同「打卡」於一身嘅旅遊飲食節目《網紅甜卡》，嚟到最後一個禮拜播映，節目內容依然甜到漏。今晚（6號）二位靚女主持廖慧儀同甜品師黎紀君由倫敦轉戰奧地利嘅維也納。當地唔只係音樂之都，甜品亦都非常之出名，百年老店林立，實有一間啱心意。二位主持出發試食打卡前，Veronica先為佢哋配搭咗具藝術氣息嘅衣著同飾物。首站嚟到歷史悠久嘅Sacher酒店，品嚐有90年歷史的Sacher Torte朱古力蛋糕。Christy試後食評是︰「睇落似係平平無奇，但食落口感好唔同，比較實同外表唔同。杏桃味好出，仲濃郁過朱古力味。」

兩位靚女主持Jessica同Christy將轉往奧地利繼續行程

聽晚（7號）Jessica同Christy推介嘅Café Landtmann喺1873年開業，被譽為維也納最優雅咖啡廳之一，係打卡迷必到之處。今次兩位女仕試晒店內三款最具特色嘅咖啡，由淡到濃，最濃一款同時有酒精成份。Christy提到喺奧地利發現一樣特點︰「喺咖啡店見到好多人睇書睇報紙好悠閒，聽聞仲可以坐足成日，都唔會畀人趕走。」接住下一站佢哋去到Vollpension餐廳，店內過半數員工為超過60歲長者，Jessica介紹時話「間餐廳係社企經營，用意係幫長者賺額外收入，更多機會接觸社會。」餐廳佈置很有外婆家嘅氣息，店內無特定嘅餐單，食物內容由當值嘅「grandmom on duty」決定，煮佢哋最擅長嘅菜式。當日主打甜品係蘋果蛋糕。見到Doris婆婆跟Jessica學整心心打卡嗰份喜悅，就知道餐廳銷售嘅係人情味同親切感，點只係甜咁簡單。

Jessica同Christy繼續出遊歐洲嘆世界

此外，呢集節目，另一個行程係睇騷學整餅，廚師將教授製作奧地利國民美食蘋果卷，變成一場棟篤笑式嘅表演，由搓粉、拉麵團到放入焗爐，全程極盡搞笑，睇到Jessica同Christy心花怒放。表演完畢仲可以品嚐蘋果卷，有得食又有得睇認真抵玩。

佢哋亦會繼續飽嘗唔同特色甜品

《網紅甜卡》最終篇｜逢周一至五晚 20:30 J2