黃淑蔓跟邵美君學戲提升演技 電影新作包辦唱作主唱曲

黃淑蔓貴為演藝界初哥，不斷作多方面嘗試，最近有幸擔任吳詠琪導演微電影女主角，為提升演技，佢專程跟舞台劇演員兼戲劇導師邵美君學戲，Feanna話「好開心，再次同導演吳詠琪合作，亦因為今次project，我有機會出一首歌。而且係我第一次作曲，好開心邀請到我非常欣賞嘅音樂人SHIMICA一齊寫歌。第一次參與作曲我好緊張，以前我自己一個試吓作曲嘅時候，成日好擔心旋律上做得唔好，搞到個過程拖得好慢。今次多謝A&R嘅同事Viki Chan，陪我一齊去SHIMICA嘅錄音室，我哋諗到旋律就立即寫低同試唱，仲要多謝當晚幫我哋伴奏嘅Howard。創作過程中，我搵到一個平靜嘅自己。雖然之前會緊張，但以我嘅樂理知識，加上事前同導演了解劇本，將自己對故事嘅感受放入旋律。」而新歌曲風亦有別於以往青春活潑類型，因此連唱法都有所改變。

黃淑蔓最近唔止組女團，近日又擔任微電影女主角同首次作曲

不斷追求進步嘅Feanna，拍攝微電影《深房》之前，特別跟著名戲劇導師邵美君上演戲班，「今次電影有好多嚟自隔籬鄰舍同樓上嘅撞擊、嘈吵聲音，但其實拍攝嘅地方好寧靜，我要靠幻想去演，然後發現原來我缺乏想像力。多謝邵美君老師教我好多演戲方法，刺激咗我喺演戲方面好多新想法。」佢第一堂就被邵老師激發，情緒崩潰「我好喜歡邵老師嘅說話：『演戲冇分對與錯，每個人表達情緒嘅方式都唔同。』因為我過往錯誤認知，以為情緒演繹有標準，我要達到指標。其實只要代入情境和角色，自然地做出嚟就啱。邵老師啟發咗我好多，令我更加勇敢去試不同嘅表達方式。」得到高人指點，Feanna演技進步神速，微電影上架後，獲讚有驚喜。

Feanna拍攝前更特別跟老師學戲不斷練習